"Navbahor"da yana bir rossiyalik murabbiy ishlaydi

15 oktyabr kuni yana bir rossiyalik mutaxassis Aleksey Ilich Belenkov Namanganga keladi. Belenkov parvoz qilgan samolyot shu kuni ertalabki soat 6:30da Namangan aeroportiga qo'nadi. Mazkur mutaxassisni “Navbahor” PFK vakillari va muxlislarning kutib olishlari rejalashtirilmoqda.

Aleksey Belenkov 1957 yilning 26 martida Rossiyaning Moskva viloyatida tug'ilgan. Futbolchilik faoliyati davomida “Torpedo” (Moskva, 1974-1977), CSKA (Moskva, 1978-1980), “Lokomotiv” (Moskva, 1981-1982) klublarida to'p surgan. SHuningdek, sobiq ittifoq U-19, sobiq ittifoq U-21terma jamoalarida ham o'ynagan.

Aleksey Belenkov

Murabbiylik faoliyatida davomida esa Rossiyaning “Pele” (1992), “Torpedo - MKB” (1993), “Titan” (1994-1995, 1997-1998), “SHinnik” (1996), “Saturn-2” (2000), “Saturn- Ren-TV” (2001-2002), “Sokol” (2003), “Ximki” (2004, 2012-2013), “Saturn” (2005-2006), CSKA (o'rinbosarlar, 2008), “Alaniya” (2009), “Torpedo - ZIL” (2010), “Ufa” (2011), “Dinamo” (Bryansk, 2012), “Torpedo” (Moskva, 2014-2015), “Solyaris” (2016) va Qozog'istonning “SHaxtyor” (Qarag'anda, 2004) klublarida ishlagan. 2016 yildan buyon ayni paytgacha Rossiyaning “Tom” (Tomsk) jamoasida faoliyat olib borayotgandi.

Kelasi haftadan esa Aleksey Belenkov “Navbahor”da yordamchi murabbiy sifatida ish boshlaydi.

Ayni paytda “Navbahor”ning murabbiylar shtabidan Andrey Kanchelskis, SHavkat Abduxo'jaev, Durbek Umaraliev,  Mustafo Bayramov va Azam Rajabbaev o'rin olishgan.