Ketma-ket ikki uchrashuvda - uchta gol! Oxirgi to'rtta o'yinni oladigan bo'lsak, termamiz kiritgan jami 5ta golning naqd 4tasi (!) Bikmaev hisobiga yozildi.
So'ngi yillarda hujumchilar borasida u qadar maqtana olmayotgan o'zbek futbolida Marat sentyabr-oktyabr oylarida qayd etgan bunday etiborli ko'rsatkichlarni biz oxirgi marta qachon kuzatganmiz?
2015 yil 8 sentyabr kuni O'zbekiston JCH-2018 saralashining 2-bosqichi guruh bahsida safarda Filippinni 5:1 hisobida enggandi. O'sha uchrashuvda Igor Sergeev bilan Sardor Rashidov ikkitadan gol urishgan edi. Termamizning shundan keyingi bellashuvi 2015 yil 8 oktyabr kuni bo'lib o'tgan. JCH-2018 saralashining huddi o'sha bosqichida biz mehmonda endi Bahraynni mag'lub etdik – 4:0. Sergeev bilan Rashidov bu o'yinda bittadan golga mualliflik qilishdi. Demak, milliy terma jamoamiz tarkibida ketma-ket 2ta bahsda 3ta gol urish borasidagi so'ngi holat kechagi kungacha I.Sergeev va S.Rashidovga tegishli bo'lib kelayotgandi. Va, mana, nihoyat, 3 yilu 8 kun deganda, Marat Bikmaev mazkur natijani takrorladi.
Termamizning oxirgi 4ta uchrashuvida raqiblar darvozalariga 4ta gol kiritgan Marat Bikmaev bu jabhada ham so'ngi futbolchimiz bo'lib turgan Igor Sergeevning ushbu yo'nalishdagi ko'rsatkichini ham birmuncha takrorladi, desak ham bo'laveradi. Gap shundaki, yuqorida tilga olingan Bahrayn bilan o'yindan keyin O'zbekiston JCH saralashining yana o'sha raundida 2015 yil 12 noyabr kuni uyda SHimoliy Koreyani enggan (3:1). Gollarning biri Sergeev hisobiga yozilgan. Yani o'sha mahal Igor termamiz safida qatorasiga 3 uchrashuvda 4ta gol kiritishga muvaffaq bo'lgandi. Farqi - Bikmaevga bu natijaga erishish uchun birin-ketin 4ta o'yin kerak bo'ldi. 27 kuni kam uch yil bo'lgandiki, hali hech kim termamiz tarkibida ketma-ket 3 yoki ketma-ket 4 o'yinda jami 4ta gol ura olmayotgan edi.
Ulug'bek Mirzaev statistikasi
Bosh sahifaga
225
