O'zbekiston kubogi finali oldidan matbuot anjumani bo'lib o'tadi

Mamlakat kubogining hal qiluvchi o'yini 28 oktyabr kuni Farg'ona shahridagi muhtasham – "Istiqlol" stadionida bo'lib o'tadi. Final uchrashuvi soat 15:00da start oladi.

Finaldan bir kun avval har ikki jamoa ustozlari hamda bir nafardan etakchi futbolchilari ishtirokida o'yin oldi matbuot anjumani tashkil etiladi. O'zbekiston Professional Futbol Ligasida akkreditaciyadan o'tgan barcha turdagi OAV vakillari mazkur uchrashuv oldi tadbirlari, o'yin va uning atrofidagi barcha voqeliklarni bevosita voqea joyidan yoritishlari mumkin bo'ladi. Buning uchun PFL elektron pochtasi ([email protected])ga har bir nashr finalga boradigan jurnalistlari ro'yxatini taqdim etishi lozim.

AGMK jamoasi 27 oktyabr kuni soat 16:00da "Istiqlol" stadionida o'yin oldi rasmiy mashg'ulotini o'tkazadi. Uning dastlabki 15 daqiqasi OAV vakillari uchun ochiq tarzda o'tadi. Soat 16:45da "Paxtakor" jamoasi bosh murabbiyi SHota Arveladze hamda "sherlar"ning bir nafar futbolchisi ishtirokida matbuot anjumani bo'lib o'tadi. Soat 17:00dan boshlab esa "Paxtakor" rasmiy mashg'ulot o'tkazadi va uning ham 15 daqiqasi ochiq tarzda o'tadi. Soat 17:15da AGMK ustozi Baxtiyor Ashurmatov va jamoa futbolchisi ishtirokida o'yin oldi matbuot anjumani bo'lib o'tadi.

Mazkur o'yinni yuqori saviyada tashkil etishga katta tayyorgarlik ishlari olib borilmoqda. O'yin kuni uchrashuv boshlanishi oldidan stadionga tashrif buyuradigan muxlislar uchun katta koncert dasturi tashkil etiladi.

Barchani final bahsiga taklif etamiz!