SHuni aytish lozim, Timur Hakimov o'z paytida iqtidorli yoshlardan biri edi. Ammo oradan vaqt o'tib nimagadir uning o'yini chiqmay qoldi. Buning sabablari xususida atroflicha to'xtalish mumkin. Keling, yaxshisi nimalar bo'lganini Timurning o'zidan eshitamiz.
- Timur, xarakterim og'ir deb aytib o'tdingiz. Misol uchun Ikrom Aliboev ham xarakterga ega futbolchi. Lekin shu yigit yuqori saviyada o'ynab ketdi.
- Aliboevning omadi Vadim Abramov qo'liga tushgani bo'ldi. Abramov shunday insonki, agar siz haq bo'lib gap qaytarsangiz, u kishi buni to'g'ri qabul qiladi. Lekin haq bo'lib ham Babayanga gap qaytarsangiz, u sizning faoliyatingizga “nuqta” qo'yadi. Qolaversa, Vadim Karlenovich hamma uchun ochiq inson, ammo Babayan haqida bunday deb bo'lmasdi. Karlenovich gapingni isbotlab ber deydi va isbotlay olsangiz to'g'ri tushunadi. Abramov qo'l ostida nima uchun futbolchilar yaxshi o'ynagan? CHunki u kishi jamoadagi hamma bilan gaplashardi. Futbolchilar Abramovdan qo'rqmasdi, balki hurmat qilishardi. Lekin hozir shunday murabbiylar borki, ular bilan faqat mashg'ulotda ko'rishasiz, salom berasiz va shu bilan muloqot tugaydi.
- 2010 yil Toshkentda o'tkazilgan o'smirlar o'rtasidagi Osiyo chempionatida ko'p futbolchilar yarq etib porlagandi. Oradan bir yil o'tib Meksikaga borib u erda ham chiroyli o'yin namoyish etdingiz. Lekin shundan so'ng aksar futbolchilar ko'rinmay qoldi. Buning sababi nimada deb o'ylaysiz?
- Futbolchilarning o'zidan ham xato o'tgan. Lekin men boshqalar uchun javob bera olmayman. O'zim haqimda gapiradigan bo'lsam, men o'sha paytlari chindan ham yulduzlik kasaliga uchragandim.
- Yulduzlik kasaliga uchrash qanday bo'larkan? Bu nimalarda seziladi?
- Ko'cha-ko'yda sizni hamma taniydi. Odamlar doim maqtaydi. O'zimni boshqacha his qilardim. Lekin hech qachon besabab birorta mashg'ulotni o'tkazib yubormaganman. Men o'shanda ancha yosh edim va hamma tanigani uchunmi o'zimni zo'r futbolchi bo'ldim deb hisoblardim. Afsus, xato qilgan ekanman. Yosh edim, mashinam bor edi, terma jamoada o'ynardim, o'zimcha osmonlarda yurardim. Hammasi zo'r bo'ladi, meni chetga jo'natishadi deb o'ylardim. Lekin bunday bo'lmadi va shu erda qolishimga to'g'ri keldi. O'FAda ishlaydigan Olim Arifov degan kishi bor, siz yaxshi taniysiz. SHu aka menga Qatardan klub topib bergandi. Qishda “Olmaliq”qa qarshi suniy maydonda o'rtoqlik uchrashuvi o'tkazdik. O'yindan keyin bilsam Qatardan menga samolyot chiptasini yuborishgan ekan. Ketaman deb juda xursand bo'lganman. Ammo Babayan oldimga kelib bu taklifni rad qil, sen “Paxtakor”da qolasan degan. Keyin majbur qoldim va o'sha mavsum hammasini qo'shib hisoblaganda 90 daqiqacha o'ynadim.
- 2014 yil “Olmaliq”qa borib bu jamoada ham ko'p o'ynamagansiz.
- 2012 yil “Paxtakor” safida oliy ligada atigi ikkita o'yinda maydonga tushganman. “Yujanin” bilan Kubok bellashuvida Farhod aka Tojiev bilan hujum chizig'ida birga o'ynagandik. Meni “Olmaliq”qa hech kim chaqirmagan, “Paxtakor”dan o'zim ketib meni ham o'ynating deb Igor Anatolevich SHkvirin oldiga borganman. SHkvirin menga markaziy hujumchi sifatida qaragandi, lekin bo'yim past bo'lgani uchun markazda o'ynay olmasligimni bilardim. Menga ko'proq qanot yarim himoyasida o'ynash yoqadi. “Olmaliq”da Sanjar SHoahmedov ikkalamiz tandem bo'lib o'ynaganmiz.
- SHundan so'ng nima bo'ldi?
- CHempionat tugaganidan keyin yana o'zimga jamoa axtara boshladim va birinchi ligadagi “Oqtepa”ga bordim. Birinchi ligada yomon o'ynamadim, bir mavsumda 25tacha gol urdim. 2016 yil “So'g'diyona” yig'inida qatnashib shu klub bilan shartnoma tuzdim. O'shanda meni Aleksandr Mochinov chaqirgandi. Bu paytga kelib futbolchilar tili bilan aytganda erkin agent edim. “Paxtakor”dan ketishim oson bo'lmagan deb aytib o'tdim. Transfer narximni sotib olishim uchun Babayan mendan 100 million so'm so'ragan. SHuncha pul bersang shartnomani bekor qilamiz va sen bemalol ketaverasan degan. Ammo menda buncha pul yo'q edi. Agar 100 million topib berganimda ham 150 million berasan derdi. Keyin noiloj Mirabror Zufarovich oldilariga kirdim. Masala bir kunda hal bo'ldi va ertasi kuni Babayan meni chaqirib shartnomamni qo'limga tutqazdi va ketaver dedi.
- Nima sababdan Samvel Babayanni ko'proq ayblaysiz?
- CHunki yaxshi o'ynab keta olmaganim uchun birinchi o'rinda shu kishini aybdor deb bilaman. Agar Babayan xohlasa “daraxt”dan futbolchi qila oladi. Lekin menda iqtidor bor edi. Yoshlar va o'smirlar terma jamoalarida o'zimni ko'rsatganman. Men ham futbol o'ynashni bilaman. Balki etibor berganida hozir yaxshi futbolchi bo'lib etishishim mumkin edi. SHaxsiy munosabatlarim hech qachon yomon bo'lmagan. Ammo o'yinga kelganda doim zaxirada qolardim.
- “Oqtepa”ga klub rahbari G'anisher aka SHog'ulomov chaqirganmi?
- Yo'q, o'zim borganman. Ildar Magdeev “Oqtepa”da o'ynardi. Meni Magdeev klub rahbarlariga tavsiya qilgan. G'anisher aka "Oqtepa"ga borganimdan keyin meni ko'rgan. Jamoa bosh murabbiyi bo'lib Ildar Sakaev ishlar, u kishi doim men bilan qolasan derdi. Kubokda “Nasaf” bilan o'ynimizdan so'ng Ro'ziqul Berdiev jamoasiga chaqirdi. Lekin men Sakaevga vada berib qo'yganim uchun ketmaganman. Yangi mavsum oldidan o'tkazilgan yig'inga borganimda Sakaev sen endi kerak emassan, o'rningga boshqa futbolchi oldik dedi. Meni ham sinab ko'ring, pul yoki boshqa narsa kerak emas, faqat o'ynasam bo'ldi deganimda ham meni eshitmagan. Birinchi davra tugaganidan keyin “Nasaf”ga o'tib ketsam ham bo'lardi, ammo Ildar akaning bir og'iz gapi bilan “Oqtepa”da qolgandim.
- SHundan so'ng “So'g'diyona”ga bordingiz.
- “Oqtepa” varianti o'xshamaganidan keyin Jizzaxga yo'l oldim. Bosh murabbiy Davron Fayziev, yordamchisi Aleksandr Mochinov edi. Hali shartnomaga qo'l qo'ymasimdan oldin “Qizilqum”dan jiddiy taklif tushdi. SHaxsan Hamid aka Aktamovning o'zlari menga qo'ng'iroq qilib Navoiyga kel, “So'g'diyona” qancha pul bersa ikki barobar ko'p beraman dedilar. Lekin jizzaxliklarga vada berib qo'yganim uchun ketmadim. Afsuski, “So'g'diyona”da unchalik omadim kelmadi. Oliy ligada atigi 7ta o'yinda maydonga tushdim. Buning ustiga birinchi davrada jarohat olib qoldim. SHundan so'ng Davron akaga davolanish uchun pul kerak deganimda u kishi etibor ham bermadi. Jamoadagi hammaga oylik berilgan, faqat men chetda qolib ketgandim. Bundan juda xafa bo'lganman. Ishonasizmi, haliyam Jizzaxda pulim qolgan, lekin so'ramayman, hammasiga roziman.
- “Obod” varianti qanday yuzaga keldi?
- Bir muddat Serbiyaga borib davolanib qaytishimga to'g'ri keldi. “So'g'diyona”ni Davron Fayzievdan xafa bo'lib tark etgandim. Keyin “Obod”da ishlayotgan Kamol aka Jo'nashevdan qo'ng'iroq bo'ldi va u kishi meni jamoaga chaqirdi. “Obod”da hartugul ko'proq maydonga tushishga muvaffaq bo'ldim. 12ta uchrashuvda ishtirok etib bitta gol urdim. Lekin baribir jarohat o'z tasirini ko'rsatib qiynayverdi. Natijada bu jamoadan ham ketishga majbur bo'ldim. Yarim mavsum bekor yurganimdan so'ng o'tgan yil ikkinchi davra oldidan Vadim Abramov “Neftchi”ga chaqirdi. Karlenovich menga yordam berib beshta o'yinga tushirdi. Ammo yarim yil o'ynamaganim uchun amaliyot kamlik qildi va o'zimni ko'rsata olmadim.
- Samvel Babayan chetga ketishga ruxsat bermagan ham deylik. Lekin boshqalar o'zimizda bo'lsa ham o'ynab ketdi-ku.
- Kimga imkoniyat berilgan bo'lsa o'shalar o'ynadi. Men kam o'ynaganim uchun avvalo aybni o'zimdan qidiraman. Ko'p vaqtimni o'rinbosarlar safida o'tkazdim. “Paxtakor”ning asosiy tarkibida faqat 45 daqiqa to'p tepganim esimda, qolgan o'yinlarda esa 3-4 daqiqa o'ynaganman. Endi 3-4 daqiqa o'ynab qanaqasiga shakllanish mumkin?
- Osiyo chempionati paytida terma jamoadagi muhit boshqacha edimi?
- Ha, u paytlar zo'r davrlar bo'lgan. Men hozirgacha murabbiyimiz Ahmadjon Musaev bilan gaplashib turaman. Juda ahil jamoa edik. Maydonga qaysi tarkib tushmasin hammamiz jipslashib faqat g'alaba uchun o'ynardik. O'yindan oldin futbolchilar doira bo'lib turadi, o'shanda Abbos Maxsitaliev aytardi: bolalar oxirigacha o'ynaymiz, jonimizni bersak ham shu maydonda beramiz, lekin g'alaba qozonamiz. Jamoamizda turli millat bolalari bo'lsa-da, hammamiz bir oila edik. Bitta xonaga yig'ilib o'zbekcha koncert yoki kino ko'rardik. Ko'pchilik Abbos ikkalamizni juda qalin do'st deb biladi. Bu to'g'ri, lekin shuni unutmaslik kerak, jamoadagi hamma bir-biri bilan ahil edi. Faqat Maxsitaliev ikkalamiz oldinda o'ynaganimiz uchun muxlislar bizni ko'proq gapirardi. Odamlar doim gol uradigan futbolchilarni gapiradi. Hamma joyda shunaqa. Osiyo chempionati chorak final Suriyaga qarshi bahsda Sardor Rahmonov ochiq darvozadan to'pni qaytarib yuborgan. Janubiy Koreya bilan kechgan bellashuvda ham o'zini ko'rsatgan. Ammo uning qahramonliklarini hozir ko'pchilik eslamaydi.
- Negadir Abbos Maxsitaliev ham yuqori saviyada o'ynab keta olmadi.
- Bunga ham Babayan sababchi deb o'ylayman. Uni oz muddat Abramov o'ynatdi. Sababini bilmayman, lekin nimagadir 1994 yilda tug'ilgan futbolchilar Babayanga yoqmasdi. 1993 yilda tug'ilganlar o'ynab ketdi. Lekin 1994 yilgilar bilan bunday bo'lmadi. Bilishimcha, hozirgi “Paxtakor”da mening tengdoshlarimdan faqat Jasur Hakimov qolgan.
- Bizda yosh futbolchilar tez porlab tez so'nishi ko'p uchraydi. Buning sababi nimada bo'lishi mumkin?
- O'zimdan kelib chiqib gapiradigan bo'lsam, yoshlarga maslahatim - hech qachon yulduzlik kasaliga chalinmang. Bu yaxshi emas, o'zim boshimdan o'tkazganim uchun ham yaxshi emasligini bilaman. Faqat shug'ullanish, maydonga tushib o'ynash kerak. O'zbekistonda iqtidorlar juda ko'p, ulardan samarali foydalanishni bilish kerak.
- Yulduzlik kasaliga uchragach uydagilar qaytarishga harakat qilmaganmi?
- Uydagilar buni bilishmasdi ham. CHunki doim mashg'ulot va yig'inlarni deb uyda kam bo'lardim. Uydagilar faqat o'yinimni ko'rgan. Lpekin o'ynab keta olmaganimni ko'rib ular ham siqiladi. Kafe yoki restoranga borganim uchun negadir ko'pchilik faqat meni gapiradi. Vaholanki, ko'p futbolchilar boradi, lekin ular haqida indashmaydi. Kafega borganim bilan ertasi kuni mashg'ulotga o'z vaqtida kelganman. Hech qaysi murabbiy Hakimov mashg'ulotga kelmagan deb ayta olmaydi. Odamlar Timur Hakimov sinib qoldi deyaverganidan bu gap o'zimga ham qattiq tasir qildi. Kelajakda yuqori saviyada o'ynash uchun bitta imkoniyat bo'ladimi yo yarimtami, shundan foydalanib qolishim lozim.
- Meksika-2011dan so'ng har bir futbolchiga bittadan “Spark” berilgandi.
- To'g'risi, ikki kun o'tib o'sha mashinani sotganmiz. CHunki uyni tamirlash zarur bo'lib qolgan va buning uchun pul kerak edi. Bazilar mashinasini sotib kayf qilgan deydi. Aslida unaqa bo'lmagan. Mashinani sotishga Abdurahmon aka Fozilov yaqindan yordam bergan va puldan bir so'mini ham menga bermagan. Hammasini tiyin-tiyinigacha uydagilar qo'liga topshirgan. Men Abdurahmon akadan roziman, chunki u kishi ko'p yordam qildi. Qachon ko'chada ko'rishib qolsak, ukam futbolga qaytgin, sen futbolni sog'inmagan bo'lsang ham, futbol seni sog'ingan deydi.
- Qaysi murabbiylarga rahmat aytishni xohlaysiz?
- Vadim Abramov, “Oqtepa” rahbari G'anisher aka SHog'ulomov, Vladimir Gavrilov, Marat Miftaxutdinov, Ahmadjonov Musaev - shu insonlar menga ko'p yordam berishdi.
- Keyingi rejalar qanday?
- Avvalo Superligada o'ynash. Men yana katta futbolga qaytishni xohlayman. 2019 yil men uchun oxirgi imkoniyat bo'ladi. Yoshim ham 25ga qarab ketyapti. YO kelasi yil Superliganing birorta klubida o'ynayman yoki futbolni umuman yig'ishtiraman. Agar Pro liga jamoasidan taklif tushsa bormoqchi emasman, hozir meni faqat Superliga qiziqtiradi. Eng katta niyatim esa milliy terma jamoada o'ynash. Nodir aka Yuldashev ko'p aytganlar: sen klubda o'ynay olmasang ham, terma jamoada o'ynab ketadigan bolasan deb. O'z vaqtida Odil Ahmedov ham ko'p maslahat bergan. Odil aka doim aytardi: ko'rmayapsanmi, hatto “daraxt” ham futbol o'ynayapti, senda shuncha iqtidor bo'la turib nimaga chetda yuribsan?
- Suhbat oxirida muxlislarga aytar so'zingiz bormi?
- Muxlislarga faqat bitta gapni aytmoqchiman: hadeb internetda o'tirgandan ko'ra stadionga kelib futbol ko'ringlar, jamoalarni qo'llab-quvvatlanglar. Bir paytlari “Dinamo” Kievni boshqargan mashhur murabbiy Valeriy Lobanovskiyning matbuot anjumanida aytgan gaplari videosini ko'rib qoldim. Lobanovskiy shunday degan ekan: futbolchini faqat stadionga kelib futbol ko'radigan muxlis tanqid qilishga haqli. Men ham muxlislarni stadionga chorlab qolaman. Hozir ham ko'chada yursam ko'pchilik taniydi. Odamlarning eng ko'p beradigan savoli - nimaga sen o'ynamayapsan? Nasib qilsa keyingi yil o'zimni ko'rsatishga harakat qilaman.
Bosh sahifaga
300