Barchaga malumki, 1994 yilda tashkil etilgan “SHo'rtan” klubi oradan o'tgan davr mobaynida mamlakatimiz va Osiyo futbolida o'ziga yarasha iz qoldirishga muvaffaq bo'ldi.
Jumladan, jamoa 2004 yili O'zbekiston birinchi ligasida eng yuqori pog'onani egalladi hamda shu munosabat bilan 2005 yili oliy ligada debyut qildi. Birinchi liga g'olibligiga “SHo'rtan” ikkinchi marotaba 2014 yili ham erishdi.
2010 yilgi mavsum jamoa uchun ancha esda qolarli tarzda kechdi. “Oq bo'rilar” mamlakat kubogi finaligacha etib kelishdi. Oliy liga musobaqasida esa o'z tarixlaridagi eng yuqori – 4-o'rinni band etishdi. Buning mevasi o'laroq, G'uzor jamoasi keyingi mavsumda xalqaro arenada o'z debyutini nishonladi. OFK kubogi-2011 turnirida “SHo'rtan” 1/8 finalgacha yurish qildi.
Klub muzeyi 2015 yili yana bir sovrin bilan boyidi – g'uzorliklar O'zPFL kubogida g'oliblikni qo'lga kiritishdi.
Jamoa bugungi kunda O'zbekiston Pro-ligasida to'p surayotgan bo'lishiga qaramay, “SHo'rtan”dek o'ziga xos va mos klubni yurtimiz futbol shaydolari har doimgidek baland hurmat va ehtirom bilan tilga olishadi. “SHo'rtan”ning ashaddiy ishqibozlari esa jamoani har qanday holatda ham ardoqlashadi va sevishadi.
Umid qilamizki, jamoamizning navbatdagi muvaffaqiyatlarini muxlislarimiz uzoq kutib qolishmaydi. Ular bizni muntazam ravishda qo'llab-quvvatlashmoqdami, demak, biz ham yaqin vaqt ichida ularni yuksak natijalarimiz bilan xursand qilishga majburmiz.
Qadrli va aziz muxlislarimiz, 24 yildan buyon “SHo'rtan” bilan yonma-yon, elkama-elka turib kelayotganingiz uchun Sizga chuqur MINNATDORCHILIGIMIZNI izhor qilamiz! Hamma-hammaga rahmat!
Alohida TASHAKKURNI esa jamoamiz tuzilgan ilk kundan boshlab, yani 1994 yilning 7 noyabridan beribizga yaqindan g'amxo'rlik qilib kelayotgan, klubni bir zumga ham etiborsiz qoldirmaydigan bosh homiyimiz – “SHo'rtanneftgaz” MCHJga bildirib qolamiz!
Bosh sahifaga
367