Olimpiyachilarimiz ushbu saralash bahslariga qadar 8ta yig'in o'tkazadi. Biz har bir yig'in muddati va o'tkazilish joyini o'quvchilarimizga batafsil malumot berishga qaror qildik.
Birinchi, 12-21 noyabr kunlari futbolchilarimiz Birlashgan Arab Amirliklarida tashkil etiladigan xalqaro musobaqada ishtirok etadi. "Dubai Cup - 2018" turnirida
O'zbekistondan tashqari mezbon BAA, Yaponiya va Kuvayt olimpiya terma jamoalari ishtirok etadi.
Ikkinchi, 10-17 dekabr kunlari Toshkent shahrida o'quv-mashg'ulot yig'ini o'tkaziladi. Mavsum tugaganidan keyingi birinchi yig'in poytaxtda tashkil etiladi. Ob-havo noqulay kelmasa albatta nazorat uchrashuvlari o'tkazilishi mumkin.
Uchinchi, 18-28 dekabr kunlari Ispaniyada Yangi yil bayrami oldi xorijiy yig'in tashkil etiladi. Mazkur yig'in doirasida bir qator xorij jamoalariga qarshi nazorat bahslari o'tkaziladi. Albatta, Ispaniyada dekabr oyida ob-havo O'zbekistonga nisbatan anchagina issiq bo'ladi.
To'rtinchi, Yangi yil bayrami o'tganidan keyin olimpiyachilarimiz yana Toshkentda yig'ilishadi. Bu safargi o'quv-mashg'ulot yig'ini 4 yanvardan 10 yanvarga qadar davom etadi. Bu yig'in ham xorij yig'iniga tayyorgarlik vazifasini o'tab beradi.
Beshinchi, 10-25 yanvar kunlari oralig'ida O'zbekiston olimpiya terma jamoasi Turkiyaning Antaliya shahrida yig'in o'tkazadi. Bu safargi xorijiy yig'inda ham terma jamoamiz nazorat uchrashuvlarida maydonga tushadi. Yanvar oyida Antaliyada ajoyib ob-havo hukm surayotgan bo'ladi va Evropaning qator klublari yig'in o'tkazishlari urfga kirgan.
Oltinchi, qisqa tanaffusdan so'ng olimpiyachilarimiz fevral oyining dastlabki 10 kunligida poytaxtda yig'ilishadi. Bu yig'inda nazorat uchrashuvi rejalashtirilmagan.
Ettinchi, Toshkentdagi 9 kunlik yig'in ham xorijiy yig'inga ulanib ketadi. Hozircha 10-24 fevral kunlari oralig'ida bo'ladigan yig'in qaerda bo'lishi aniq emas. Ikkita variant bor: Ispaniya yoki Turkiya.
Sakkizinchi, 3-17 mart kunlari O'zbekiston olimpiya terma jamoasi Toshkentda yig'in o'tkazadi. Mazkur yig'in U-23 Osiyo chempionati saralashidan oldingi eng so'nggi yig'in bo'ladi. Ikki haftalik yig'inda vakillarimiz nazorat o'yinlarini o'tkazishadi.
To'qqizinchi, 18-26 mart oralig'ida Toshkentda O'zbekiston olimpiya terma jamoasi o'rin olgan U-23 Osiyo chempionati saralash guruhi o'yinlar bo'lib o'tadi. Saralash bahslariga kecha, 7 noyabr kuni qura tashlandi. Raqiblarimiz Tojikiston, Hindiston va Pokiston bo'ldi.
Eslatib o'tamiz, O'zbekiston U-23 terma jamoasi Osiyo chempionatining amaldagi chempioni hisoblanadi. 2018 yil yanvar oyida Ravshan Haydarov boshchiligidagi terma jamoamiz Xitoyda o'tgan qita chempionatida g'olib bo'lgandi. 2020 yilgi U-23 Osiyo chempionatiga Tailand mamlakati mezbonlik qiladi. Musobaqa 2020 yilning 8-26 yanvar kunlari bo'lib o'tadi.
Narzulla Saydullaev
Bosh sahifaga
143