Biroz avval O'FA rasmiy saytida "Toshkentning “Bunyodkor” klubi FIFA talabiga ko'ra 6 ochkodan mahrum qilinadi" sarlavhali xabar chiqdi. Unda yozilishicha, FIFA sentyabr oyida "Bunyodkor" futbol klubidan 6 ochko olib tashlash borasida O'FAga rasmiy murojaat bilan chiqqan. Gap Sergey Simonenkoning maoshi ustida ketyapti. Ukrainalik himoyachi haligacha "Bunyodkor"dan pulini to'liq olmagan.
Bugun O'FA Ijroqo'mi "Bunyodkor"dan 6 ochko olib tashlash borasida PFLni rasman ogohlantirdi. Endi PFL bu qarorni amalda qo'llashi kerak bo'ladi. Xullas, ushbu xabar matbuotda elon qilingach, biz zudlik bilan "Bunyodkor" PFK bosh direktori Murod Aliev bilan bog'landik.
"Bu anchadan beri davlom etib kelayotgan mavzu, - deydi Murod Boqievich. - Bizga klubdan ochkolar olib tashlanishi mumkinligi ancha oldin ogohlantirilgandi. Gap hamon Sergey Simonenkoning oylik maoshlarini to'liq olmagani haqida ketyapti. Uning puli tayyor, anchadan beri bankda turibdi. Lekin o'zi hamon Toshkentga kelib pulini olib ketgani yo'q. Biz futbolchining o'ziga ham, uning agentiga ham bu haqda aytishga ko'p marta urindik. Qolaversa bu borada Ukraina elchixonasiga ham murojaat qilganmiz".
- "Endi O'FA saytida chiqqan xabarga kelsak, men ham Ijroqo'm azosi hisoblanaman, ammo bu masala yuzasidan Ijroqo'm hali yig'ilish o'tkazgani yo'q. Agar yig'ilish bo'lganida meni ham chaqirgan bo'lishardi. Menimcha, Ijroqo'm yig'ilmasdan shunday qarorga kelingan. Bu o'rinda faqat shuni aytishim mumkin, O'FA barcha klublar qatori "Bunyojdkor"ni ham FIFA oldida himoya qilishi kerak. CHunki FIFA uchun qaysidir jamoadan olti ochko olib tashlash hech narsa emas, lekin O'FA xalqaro maydonda O'zbekiston klublarini himoya qilib, mana shunday qiyin holatlarda o'zini ko'rsatishi lozim bo'ladi".
X.Xoliqov.
Bosh sahifaga
92