"Navbahor": Ayrim futbolchilarga javob berildi, Ortiqov esa qaytdi

Ertalab futbolchilarimiz “Markaziy” o'yingohda asosan yugurish mashqlarini bajarishdi. Kechki paytdagi mashg'ulot esa “Dinamo” o'yingohida o'tkazildi. Mashg'ulotlar yakuniga etgach, jamoamiz azolari Toshkentga yo'l olishdi. Futbolchilarimiz poytaxtda 31 yanvarga qadar shug'ullanishadi. Poytaxt safari oldidan murabbiylar shtabi mashg'ulotlarda qatnashgan bir qator futbolchilarga javob berishdi. Abduaziz Sultanov, Zokir Nurmatov, Azizbek Mamazoitov va Mirzohid Sobirovlar shular jumlasidandir. Bundan tashqari, Sardor Telyakov, Muhammad Rasulov, Doniyor Inamov, Hojiakbar Yunusovlar Namanganda qolib yoshlar tarkibida shug'ullanishadi. Poytaxtdagi o'quv-mashg'ulot yig'inida jamoamiz tarkibiga bir qator futbolchilarni qo'shilishi rejalashtirilgan. Xususan, o'tgan mavsum ikkinchi yarmini jamoamiz darvozasini qo'riqlagan Akmal Ortiqov ham safga qo'shiladi. Ayni paytda ushbu darvozabon qolgan jamoamiz azolari bilan birgalikda Toshkentga ketmoqda. Ortiqovning “Olmaliq” bilan amaldagi shartnomasi borligi sababli olmaliqliklar yig'inida qatnashayotgandi. Toshkentda nazorat o'yinlari ham o'tkaziladi. Dastlabki uchrashuv 17 yanvar kuni Qarshining “Nasaf” jamoasiga qarshi bo'lib o'tadi.