«Milan»ning chempionatdagi ketma-ket g'alabali seriyalaridan so'ng Gattuzoni rosa maqtashdi. Ammo shuni aytish kerakki, qo'lga kiritilgan g'alabalar hakam tomonidan qo'shib berilgan daqiqalarda qayd etildi va bu jamoa o'yinida keskin o'zgarish yuzaga kelgani yo'q.
«Milan» mag'lub etgan «Sampdoriya», «Jenoa» va «Udineze» o'sha paytda o'zlarining optimal sport formalarida emasdi. «Milan» turnir jadvalida ECHLga yo'llanma beruvchi hududda ham bo'lishga ulgurdi, ammo o'shanda ham muammolar hali bartaraf etilgani yo'qligini ko'rsatib turgandi.
«Yuventus» bilan bo'lgan bahs buni amalda yana ko'rsatib berdi. Ustiga-ustak o'sha o'yinda jamoa to'purari Gonsalo Iguain qizil kartochka olishi bugungi to'qnashuvda ham «Milan»ga qo'shimcha qiyinchilik taqdim etadi.
«Lacio»ga qarshi «Milan» asosiy «snayperi»siz qiynalib qolishi aniq. Biroq bu Gattuzo oldida turgan yagona muammo emas. Gap shundaki, yaqindagina jarrohlik stoliga yotgan Bonaventura mavsum yakuniga qadar safdan chiqdi. Lukas Bilya yaqin 4 oy davomida jamoaga yordam berolmaydi. Lazaretni shuningdek yana uch markaziy himoyachilar: Mattia Kaldara, Mateo Musakko va Andrea Romanoli to'ldirib turishibdi. Bu esa Gattuzoni yana taktik sxemani o'zgartirishga majbur qiladi. «Lacio»ga qarshi Gattuzo katta ehtimol futbolchilarni 3-4-3 joylashuvi asosida maydonga tushiradi. «Milan»ning mazkur sxemasi ishonchli o'yinni kafolatlamaydi. SHundoq ham «Milan» chempionatda 16ta gol utkazib yuborib eng kam gol qo'yvorgan jamoalar ichida 11-o'rinni egallab turibdi.
«Lacio» joriy mavsumda mavsumda faqatgina «Yuventus» va «Napoli» darvozasiga yo'l topa olmadi. Qolgan uchrashuvlarda rimliklarning hujum chizig'i uyaltirmayapti. Ammo bu «Lacio»ga jiddiyroq vazifalar uchun kurashishga etarli bo'lmayapti. Jamoa o'zidan kuchliroq yoki turnir jadvalida teparoq turgan raqiblar bilan muammolarga duch kelmoqda. Ammo turnir jadvalida o'zidan pastki o'rinda borayotgan jamoalarga qarshi ishonchli o'ynab, ochkolar hisobini oshirib borishmoqda. «Milan» esa buni ham uddalay olmayapti.
«Lacio» ayni paytda o'yin jihatidan ham, ruhiy taraflama ham «Milan»dan ustunroq ko'rinmokda. Bu esa ularga mazkur bahsda favorit nomini beradi.
Taxminiy tarkiblar:
«Lacio»: Strakosha – Uollas, Acherbi, Radu – Marushich, Parolo, Badel, Lulich – Luis Alberto, Milinkovich-Savich – Immobile
«Milan»: D. Donnarumma – Abate, Sapata, Rodriges – Kalabriya, Kesse, Bakayoko, Laksalt – Suso, Kutrone, CHalxanoglu
 Lazio | Serie A . 13-tur 25/11/2018, 22:00 - : - Boshlanmadi |  AC Milan |
Stadion: Stadio Olimpico, Rome
Bosh hakam: Luca Banti
SHahboz Beg'amov
Bosh sahifaga
175