O'zbekiston - Janubiy Koreya o'yinini boshqargan hakam borasida OFKga murojaat qilindi

Eslatib o'tamiz, ushbu hakam O'zbekiston - Janubiy Koreya o'yinini boshqargan va bir necha bor qo'pol xatolarga yo'l qo'ygan edi.

Uff.uz'ga xabar qilinishicha, O'zbekiston olimpiya terma jamoasi tomonidan bildirilgan murojaatda hakam Janubiy Koreyaga qarshi kechgan uchrashuvda bir qator vaziyatlarda noto'g'ri qaror qabul qilgani aytilgan va musobaqa yakuniga qadar ushbu hakam O'zbekiston ishtirokidagi o'yinlarni boshqarmasligi so'ralgan. Xususan murojaatda quyidagicha fikr bildiriladi.

"Bunday hakamlik OFKning obro'yiga mos kelmaydi deb hisoblaymiz. O'yin tasviri qayta ko'rib chiqilgach shunday xulosaga keldikki, ayrim vaziyatlarda hakam O'zbekiston olimpiya terma jamoasi zarariga noto'g'ri qaror qabul qilgan. Buning natijasida O'zbekistonning bir qator OAVlarida norozilik bildirildi va muxlislar o'rtasida Osiyo futboli borasida salbiy fikrlar paydo bo'lmoqda.

SHu sababga ko'ra O'zbekiston - Janubiy Koreya o'yinini boshqargan hakam musobaqa yakuniga qadar O'zbekiston olimpiya terma jamoasi ishtirokidagi o'yinlarga tayinlanmasligini so'raymiz".

Eslatib o'tamiz, saudiya arabistonilik hakam Fahad al Mirdasiy O'zbekiston - Janubiy Koreya o'yini uchun juda past hisoblanadigan 4 baho olgani xabar qilinmoqda, ammo bu malumot rasmiy tasdig'ini topganicha yo'q.

Zafar QOSIMOV, Doha