"Lokomotiv" Saudiya Arabistoni etakchisi bilan durang o'ynadi

Raqib - Saudiya Arabistoni Pro-ligasi etakchisi “Al-Ahli”.

Bosh murabbiy Mirko Elichich boshlang'ich tarkibda ikkita hujumchini maydonga tushirishga qaror qildi. Timurxo'ja Abduholiqovga Doniyor Usmonov yordam berishi ko'zda tutilgandi. Yarim himoya qanotlarini katta Jasur Hasanov hamda Sardor Mirzaev egallashdi. Ularning ortida mos ravishda Oleg Zoteev va kichik Hasanov to'p surishdi. Himoya markazida To'xtaxo'jaev-Muxtorov tandemi sinovdan o'tkazilgan bo'lsa, markaz ikki tajribali futbolchi – Server Jeparov hamda Kaxi Maxaradzega ishonib topshirildi.

Saudiya chempionatining birinchi davrasi ortda qolganligini inobatga oladigan bo'lsak, raqib jamoaning o'yin amaliyoti bobida muammosi yo'q edi. “Lokomotiv”da esa shuning aksi – qishki tatildan keyin futbolchilar sekin-asta tiklanib kelishmoqda. Bu farq o'yinning borishiga tasir etayotganligini payqash qiyin emasdi. SHunga qaramay “temiryo'lchilar” birinchi bo'limda raqib bilan tengma-kurash olib borishdi.

Dastlabki 45 daqiqada hisob ochilmadi. Ignatiy Nesterov ishonchli o'yin ko'rsatgan bo'lsa, oldingi chiziqda Timurxo'ja Abduholiqovning omadi yurishmadi. Bir safar u darvozabon bilan yuzma-yuz vaziyatdan foydalana olmadi.

Ikkinchi bo'limda Elichich zahirada qoldirilgan barcha futbolchilarni maydonga tushirishga qaror qildi. SHu tariqa Islom To'xtaxo'jaev, Oleg Zoteev va katta Jasur Hasanovdan tashqari boshlang'ich tarkibning qolgan futbolchilari o'z o'rinlarini bo'shatib berishdi. 70-daqiqaga kelib Zoteev hamda Hasanovga ham dam berildi. Ularning o'rnini Xurshid Muxtorov hamda Doniyor Usmonov qaytadan egallashdi. Bahs o'rtoqlik maqomida bo'lgani uchun buning iloji bor edi.

Bo'lim avvalini raqib faol boshlagan bo'lsada, maydonga tushirilgan “Lokomotiv” futbolchilari o'yinga kirishib ketishgach, uning suratini tenglashtirishdi. Taymda golga tortishi mumkin bo'lgan vaziyatlar birinchisiga qaraganda kamroq sodir etildi.

SHu tariqa teng kurashlar ostida kechgan uchrashuvda hisob ochilmadi – 0:0. Futbolchilarimizning o'yin amaliyoti etarli bo'lmagan bir vaqtda Saudiya etakchisi darvozamizni ishg'ol qila olmadi.

Eslatib o'tamiz, “Lokomotiv” navbatdagi o'rtoqlik uchrashuvini 19 yanvar kuni o'tkazadi. Bu safar “temiryo'lchilar” Xitoy chempionatini 5-o'rinda yakunlagan “Xenan Jiane”ga raqib bo'ladilar. Tarkibida Janubiy Koreya, Portugaliya, Braziliya kabi mamlakatlardan legionerlari bor jamoada O'zbekiston milliy terma jamoasining bo'lajak raqibi - Filippin safida to'p suradigan Xaver Patino ham to'p suradi.

15 yanvar, 2016 yil

Xalqaro o'rtoqlik uchrashuvi

“AL-AHLI” (S. Arabistoni) – LOKOMOTIV (O'zbekiston) 0:0

“Lokomotiv”: 1. Ignatiy Nesterov (12. Mamur Ikromov, 46), 36. Xurshid Muxtorov (4. SHerzod Fayziev, 46), 20. Islom To'xtaxo'jaev, 35. Oleg Zoteev, 24. Kaxi Maxaradze (18. Timur Kapadze, 46), 16. Jasur Hasanov (68. Sergey Proxorov, 46), 77. Jasur Hasanov, 21. Server Jeparov (22. Sanjar SHoahmedov, 46), 8. Sardor Mirzaev (41. Quvondiq Ro'ziev, 46), 11. Timurxo'ja Abduholiqov (7. Ivan Vukovich, 46), 34. Doniyor Usmonov (10. Marat Bikmaev, 46).

Ogohlantirishlar: Sergey Proxorov (60), SHerzod Fayziev (77).