Tur o'yini - yo'q
O'rtoqlik maqomidagi o'tgan tur o'yinlarida etirofga loyiq uchrashuv bo'lgani yo'q.
Tur muxlislari - yo'q
Stadionlarga tomoshabinlar tashrifi keskin pasayib ketgani uchun ham mazkur nominaciyani hech kimga bermaslikka qaror qildik. CHempionlikni belgilab bergan Toshkent derbisiga ham atigi 2800 tomoshabin tashrif buyurgandi. "Paxtakor" - "Bunyodkor" o'rtasidagi uchrashuvda derbi tarixidagi anti-rekord qayd etildi. Bu ko'rsatkichning o'ziyoq Superligaga berilgan haqiqiy baho, desak mubolag'a bo'lmaydi.
Tur hakami - Vladislav Ceytlin
Superliganing 32-turi doirasidagi "Paxtakor" - "Bunyodkor" (4:0) uchrashuvida ishlagan Vladislav Ceytlin hakamlik faoliyatidagi oxirgi bahsini o'tkazdi.
Ceytlin mazkur o'yinni juda yaxshi saviyadagi va bexato boshqarib bordi. Faoliyatidagi so'nggi uchrashuvini o'tkazgan Ceytlinni tur hakami deya etirofga loyiq ko'rdik.
Tur matbuot xizmati - yo'q
Afsuski, bu turda hech bir klub matbuot xizmatini alohida ajratib ko'rsata olmaymiz. Rasmiy sayt va ijtimoiy tarmoqlarda birdek faol bo'lgan matbuot xizmati uchramaganligi sabab bu safar ushbu nominaciyani hech kimga bermaslikka qaror qildik.
Tur iqtibosi: "Ko'p gap eshakka yuk"
"Paxtakor"ga qarshi o'yindan keyin "Bunyodkor" bosh murabbiyi Mirjalol Qosimov ko'p gapirib o'tirishni istamadi va o'yin haqidagi fikrlarini qo'yidagicha izohladi.
"Nihoyat chempionatni tugatdik. Qiziqarli chempionat bo'ldi. O'ylaymanki "Bunyodkor" yomon o'yin ko'rsatgani yo'q, o'z muxlislari mehrini qozondi. "Paxtakor"ni haqli g'alaba bilan tabriklayman. Biz biroz vaqtliroq "tatilga chiqib qo'ydik". Natijaga qaramay aytishim mumkin: yigitlar bilan faxrlanaman. Ko'p gap eshakka yuk deydiku.
Tatilga chiqdik, yaxshi dam olsak bo'lgani. Jurnalistlarga ham rahmat aytaman, futbolchilar, murabbiylar va muxlislar o'rtasida turib yangiliklarni etkazib bordinglar.
Keyingi yil OCHLda o'ynaydigan barcha klublarimizga omad tilayman. Yanvar oyidagi Osiyo Kubogida milliy terma jamoamizga va mart oyida olimpiya terma jamoamizga omad tilayman. Yaxshi dam mehnatga hamdam", - deydi Mirjalol Qosimov.
Tur goli - Zafar To'raev
"Metallurg" yarim himoyachisi Zafar To'raevning "Buxoro" darvozasiga kiritgan ajoyib goli turni bezab berdi.
Zafar To'raev o'tkir burchakdan to'pni darvozabonning ustidan oshirib burama tarzida chiroyli gol kiritdi. Bu gol shubhasiz turning eng chiroyli goliga aylandi.
Tur darvozaboni - Sanjar Quvvatov
"Nasaf" darvozaboni Sanjar Quvvatov "So'g'diyona"ga qarshi o'yinda o'z darvozasini ishonchli qo'riqladi.
Mazkur turda darvozabonlarga o'zini ko'rsatish uchun ko'p ham ish topilmadi. Jizzaxda o'tgan "So'g'diyona" - "Nasaf" to'qnashuvida qarshiliklar posboni bir qator vaziyatlarda seyv namoyish etib, o'z darvozasini quruq saqlashga erishdi.
Tur murabbiyi - Andrey Fyodorov
"Lokomotiv" jamoasi Andrey Fyodorov qo'l ostida Superligada allaqachon chempionlikni nishonlagan bo'lsada Namangan safariga shunchaki tashrif buyurmaganini isbotladi.
Superligadagi oltin va bronza medallari sohiblarining o'zaro uchrashuvlarida mezbonlarning o'z uyidagi ikki yillik mag'lubiyatsiz seriyasiga barham berildi. Aynan Fyodorov boshchiligidagi chempion jamoa "Navbahor"ning mag'lubiyatsiz seriyasiga chek qo'ygani uchun ham tur murabbiyi sifatida "Lokomotiv" ustozini tanladik.
Tur futbolchisi - Tiago Bezerra
"Paxtakor"ning braziliyalik legioneri Tiago Bezerra chempionatning oxirgi turida xet-trik qayd etib to'purarlar poygasida yakka peshqadamga aylandi.
"Bunyodkor"ga qarshi o'yinda juda faol o'ynagan va haqli ravishda raqiblar darvozasini ishg'ol etgan Bezerra mavsumning yakuniga chiroyli "nuqta" qo'yishga muvaffaq bo'ldi. SHu tariqa Bezerra 17 gol bilan chempionat to'purariga aylandi.
Tur ramziy terma jamoasi (4-2-3-1):
Darvozabon: Sanjar Quvvatov ("Nasaf")
Himoyachilar: Murod Xolmuhammedov ("Qo'qon-1912"), G'olib G'aybullaev ("Nasaf"), Kaxi Maxaradze ("Lokomotiv"), Dilshod Saitov ("Nasaf")
Yarim himoyachilar: Yovan Jokich (AGMK), Zafar To'raev ("Metallurg"), Dilshod Rahmatullaev ("Paxtakor") Sardor Rashidov ("Lokomotiv"), Jasur Hasanov (AGMK)
Hujumchilar: Tiago Bezerra ("Paxtakor")
Superliga to'purari: Tiago Bezerra ("Paxtakor") - 17 gol
Superliga assistentlari: Sardor Sobirxo'jaev ("Bunyodkor") va Jasur Hasanov (AGMK) - 12 tadan
Superliga yakuniy turnir jadvali
Bosh sahifaga
143