Klub rasmiy saytida «Sizningcha, «Dinamo» jamoasining 2018 yildagi eng yaxshi futbolchisi kim?» so'rovnomasida eng ko'p ovoz to'plagan futbolchi – Akmal Xolmurodov bo'ldi. Mavsumning ikkinchi qismiga tarkibga qo'shilgan himoyachi jamoaning himoya qo'rg'oni etakchisi sifatida to'p surib, muhim gollarga ham mualliflik qildi. «Dinamo» jamoasining turnir jadvalida eng kam gol o'tkazib yuborgan Pro-Liganing eng yaxshi himoya chizig'iga ega bo'lishida Xolmurodovning hissasi katta bo'ldi. So'rovnomada Akmal Xolmurodov 133 ta ovoz (38.7%) to'plab, «Dinamo»ning 2018 yilgi eng yaxshi futbolchisi» nomiga loyiq ko'rildi.
Ikkinchi o'rindan jamoa yarimhimoyachisi Jasur Azimov joy oldi. Samarqandlik futbolchiga 129 ta (37.5%) ovoz berildi. Azimov ham mavsum davomida «Dinamo»ning faol futbolchilaridan biri sifatida to'p surib, jamoaning g'alabalariga munosib hissa qo'shdi. Qayd etish kerak, Azimov 2017 yilda «Dinamo»ning eng yaxshi futbolchisi» deb topilgandi.
So'rovnomada uchinchi o'rindan 28 (8.1%) ovoz bilan Ilhom Yunusov o'rin olgan. Samarqandlik tajribali yarimhimoyachi mavsum davomida jamoadoshlariga namuna bo'la oldi va bir qator o'yinlarda muhim gollari bilan jamoaga naf keltirdi.
SHuningdek, muxlislar yil davomida yaxshi o'yinlari bilan yodda qolgan Damir Temirov 24 (7%), Otabek Narzullaev 18 (5.2%), SHohruh Eshbo'taevlarga 12 ta ovoz (3.5%) berishgan. So'rovnomada jami 344 ta ovoz berilgan.
Eslatib o'tamiz, 2007 yildan buyon klub matbuot xizmati tomonidan so'rovnoma orqali aniqlanib kelinayotgan «Dinamo»ning «mavsumdagi eng yaxshi futbolchisi» nomiga quyidagi futbolchilar loyiq ko'rilgan:
«Dinamo»ning «yil futbolchisi» nominaciyasi g'oliblari:
2007 yil – Farhod Tojiev
2008 yil – Ilyos Qurbonov
2009 yil – Bahodir Nasimov
2010 yil – Ilhom Yunusov
2011 yil – [Devid Oniya]
2012 yil – Ivan Nagaev
2013 yil – Andrey Melnichuk
2014 yil – Andrey Melnichuk.
2015 yil – Kamoliddin Murzoev.
2016 yil – Amirjon Safarov.
2017 yil – Jasur Azimov.
2018 yil – Akmal Xolmurodov.
Bosh sahifaga
1169