Braziliyalik Ronaldo o'zini portugaliyalik Ronaldu bilan taqqosladi

O'z paytida tezkor harakati hamda chiroyli gollari bilan muxlislar etiborini qozongan Ronaldo Italiyaning "La Gazzetta dello Sport" nashriga intervyu berdi.

42 yoshli sobiq futbolchi intervyu davomida o'zi bilan portugaliyalik Ronalduni solishtirdi. "Biz ikkalamiz ham gol urishga chanqoqmiz. Ammo o'ynaydigan chiziqlarimiz boshqa-boshqa. Garchi hozir Krishtianu markazda o'ynayotgan bo'lsa-da, darvoza tomon boshqacha harakat qiladi".

"Krishtianu 33 yoshida ham ajoyib formada, u har doim o'z tanasini boshqarib turadi. Men shug'ullanishim kerak bo'lgani uchun mashg'ulot o'tkazardim, Ronaldu esa mashq qilishni yoqtirgani uchun shug'ullanadi. Portugaliyalik mendan 9 yosh kichik, qolaversa ikkimiz futbol o'ynagan davr bir-biriga o'xshamaydi. Lekin shuni aytishim mumkin, u mendan kuchli. Buni tan olish kerak", - deydi braziliyalik "so'yloq".