"Terma jamoamiz o'yindan-o'yinga kuchayib bormoqda. Xitoy bilan ham, Janubiy Koreyaga qarshi bahsda jamoamiz yaxshi ko'rindi. Lekin yakunda natijani saqlab qolishga bizga nimadir etishmayapti. Keyingi uchrashuvda nafaqat o'yin borasida, balki natija jihatdan ham o'zimiz uchun 3 ochkoni qo'lga kiritamiz, degan umiddaman. Guruhdan chiqish imkoniyatlarimizni saqlab qolganmiz", - deya gap boshladi Pavel Matyash.
- Osiyo Kubogidagi boshqa o'yinlarni ham kuzatib borish imkoniyati bo'lmoqdami yoki mashg'ulotlar tufayli butun diqqat Qirg'iziston terma jamoasiga qaratilganmi?
- Imkon doirasida ko'plab o'yinlarni kuzatishga harakat qilyapman. CHempionat menga yoqmoqda. Iordaniya terma jamoasining o'yini va qayd etayotgan natijalari meni hayron qoldirdi. Menimcha, Iordaniya Osiyo Kubogining syurpriz jamoasiga aylandi. Biz aynan mazkur jamoa bilan o'ynagandik. To'g'risi, iordaniyaliklarni keyingi bosqichga chiqishini kutmagandik.
- Zaxirada qolganingiz siz uchun syurpriz bo'ldimi?
- Yo'q. Xitoy bilan o'yinda ko'pol xatoga yo'l qo'ydim. Endi esa musobaqani zaxira o'rindig'ida kuzataman. Bugungi bahsda zaxirada qolganim men uchun yangilik bo'lmadi. Kim yaxshiroq tayyorgarlikka ega bo'lsa, o'sha futbolchi maydonga tushadi. Bu normal holat.
- Xitoy bilan o'yindagi qo'pol xato sizni ruhan sindirib qo'ymadimi? Har holda terma jamoaning birinchi raqamli kiperi hisoblanasiz...
- Hamma xato qiladi. Afsuski terma jamoam uchun muhim bellashuvda shunday qo'pol xatoga yo'l qo'ydim. Buyog'iga o'sha xatolardan to'g'ri xulosa chiqarib ishlayman.
- O'zbekiston chempionatida faoliyat ko'rsatgansiz. Bu o'lka siz uchun begona emas. Terma jamoamizning Ummonga qarshi uchrashuvini kuzatdingizmi?
- To'liq o'yinni ko'rish imkoni bo'lmadi. Uchrashuv sharhini tomosha qildim. Ummon o'yin bobida O'zbekistonni ancha qiynab qo'yibdi. Oson bo'lmagan o'yinda g'alabaga erishdinglar. Nesterovning mahorati evaziga Ummon kerakli natijani qayd etolmadi.
- O'zbekiston terma jamoasining Osiyo Kubogida imkoniyatlarini qanday baholaysiz? Har holda ko'plab futbolchilarga qarshi o'ynagansiz, ularning imkoniyatlaridan biroz bo'lsada xabardorsiz...
- Uzog'i bilan yarim finalga qadar borishi mumkin. Lekin men O'zbekiston terma jamoasi Osiyo Kubogi sohibiga aylanishiga ishonmayman. Bu juda qiyin masala.
- Osiyo Kubogidagi darvozabonlar xususida. Kim sizga ko'proq yoqmoqda?
- Ignatiy Nesterov eng tajribali va ajoyib kiper. Lekin Eron terma jamoasi posboni Alirizo Beiranvand juda kuchli darvozabon. Menimcha, musobaqaning eng yaxshi posboni aynan eronlik darvozabon bo'ladi.
SHahboz Beg'amov suhbatlashdi.
Bosh sahifaga
138