Matbuot anjumanida bosh murabbiyga Anzur Ismoilov hamrohlik qildi.
“Og'ir o'tgan ilk o'yindan so'ng ikkinchi o'yinni o'tkazamiz. Bizni juda qiyin bahs kutib turibdi. Turkmaniston Yaponiyaga qarshi munosib o'ynadi. Ertaga faqat g'alaba uchun o'ynaymiz”, - deydi Ektor Kuper.
“Ertaga bizni oson bo'lmagan o'yin kutmoqda. Raqibni o'rganib chiqdik. Birinchi qadam tashlandi, endi ikkinchi bahsda yutib yana 3 ochko olishimiz kerak”, - deydi Anzur Ismoilov.
- Ummonni mag'lub etdik, ammo o'yin borasida ko'plab savollar tug'ildi. Ilk uchrashuvdan keyin qanday xulosalar chiqardingiz?
- O'yin sifati har bir odam uchun turlicha bo'ladi. Asosiysi 3 ochko olish. Ummon Fors Ko'rfazi kubogi sohibi bo'lgandi. G'alabadan xursandmiz. Bizda muammolar borligini tushunib turibmiz. Birinchi navbatda natija turadi. Biz chiroyli o'ynashimiz mumkin, ammo bu ijobiy natijani kafolatlamaydi.
- Ilk turda Turkmaniston Osiyo etakchilaridan biriga qarshi yaxshi o'ynadi. Bu siz uchun syurpriz bo'ldimi?
- Albatta bu o'yinni ko'rdik. To'g'ri Turkmaniston yaxshi o'yin namoyish etdi. Raqib juda tartibli jamoa ekan. Biz ko'proq Yaponiyani o'rgandik, chunki bu jamoa g'alaba qozondi. Sababi doim g'alaba qozongan jamoa tahlil qilish qiyin. Yana qaytaraman, Ummon bilan juda og'ir o'yin o'tkazdik. Bizda boshqacha, Turkmanistonda boshqacha taktika bor. Ertaga kimning taktikasi samarali ekanligini ko'ramiz.
- Ertaga Krimec maydonga tushmaydi. Markaziy himoyada uning o'rnida kim o'ynaydi?
- Uning o'rnini kim to'ldirishini 100 foiz aniqlikda ayta olmayman. Bizda bu joyda yana ikki nafar futbolchi bor.
- Turkmaniston bilan himoyaviy o'yin namoyish etamizmi?
- Turkmaniston terma jamoasi himoyasida o'ziga yarasha muammolar bor. Biz ertaga ana shu muammolardan foydalanib hujum tashkil qilishga va raqib darvozasini ishg'ol qilishga urinamiz.
- Osiyo Kubogining chorak finalidan VARdan foydalaniladi. Fikringiz qanday?
- Men buni muhokama qilmayman. Ko'proq o'z jamoam bilan mashg'ulman. Albatta texnologiya bo'lsa va hakamlarga bahsli vaziyatlarda yordam bersa bu yaxshi.
- Murabbiy sifatida sizni hurmat qilaman, yaxshi natija ko'rsatishingizni istayman. Ammo muxlislar sizni juda ham keskin tanqid qilishmoqda. Ko'pchilik sizning o'yiningiz futbol emas balki antifutbol ekanini aytmoqda. Bunga munosabatingiz qanday?
- Albatta o'yinimiz ideal emas. Futbol tezkorlik bilan o'zgarib bormoqda. Vazifamiz 3 ochko olish. Muxlislar bundan yaxshiroq o'yin ko'rishni istashini bilamiz. CHiroyliroq o'ynashga harakat qilamiz albatta.
- Siz o'tgan Osiyo Kuboklarida o'ynagan tajribali futbolchi sifatida hozirgi O'zbekiston terma jamoasi haqida nima deya olasiz?
Anzur Ismoilov: - Uchta Osiyo Kubogida o'ynadim. Hozirgi tarkibda yoshlar ko'p. O'tgan yil U-23 Osiyo chempionatida chempion bo'lib kelishgandi. Hozir bizning futbolda o'sish bor.
Narzulla Saydullaev
Dubaydan mahsus
Bosh sahifaga
346