"Mehr News" agentligi vakili: "O'zbekistonning bu turnirda g'olib bo'lish imkoniyatlari past"

"Iroqqa qarshi o'yin qiyin bo'ladi, chunki ular Yaman yoki vetnamliklardan kuchliroq.  Futbolchilar jismonan baquvvat, maydonni yaxshi ko'ra olishadi, qarorlar chiqarishda kam adashishadi, qisqa va uzun paslarda yaxshi harakat qilishadi. Biroq Eron terma jamoasi ushbu uchrashuvda g'alaba qozona oladi. Milliy jamoamiz o'yinchilari ham raqib kabi jismonan kuchli va tartibli. Natija biz uchun ijobiy bo'ladi deb umid qilaman.
Ravshan Ermatov? Ermatovni yaxshi taniymiz. U Eronga ko'p kelgan, "Ozodiy" stadionidagi uchrashuvlarni boshqargan. U elkama-elka kurashlarga ko'p imkon beradi.
To'purarlar poygasi? Sardor Azmun va Eldor SHomurodov ushbu turnirda 3tadan gol urdi. Azmun haqida to'xtaladigan bo'lsak, u haqiqiy hujumchi. Sardor raqib harakatlarini oldindan o'qiy oladi va qaerda zarba berish yoki aldash kerakligini yaxshi biladi. Eldor SHomurodov ham yaxshi forvard. U Azmun kabi Rossiya Premer-ligasida o'ynaydi. To'purarlar poygasida Azmun g'alaba qozonishiga umid qilaman.
BAAda o'tayotgan Osiyo Kubogiga Erondan 20ga yaqin jurnalistlar tashrif buyurishgan. Men ishlaydigan "Mehr News" nashrida 200dan ortiq xodim ishlaydi. Nashrimizda futbolni yoritadigan jurnalistlar soni 5 kishi va ularning barchasi hozir ushbu musobaqada ishlashmoqda.
Osiyo Kubogida O'zbekiston terma jamoasi ham ishtirok etyapti. Ayni damda jamoangizni mashhur Ektor Kuper boshqarmoqda. Ushbu mutaxassis himoyaviy taktikani maqul ko'radi. U ko'proq o'z darvozasini quruq saqlash haqida o'ylaydi. O'z g'oyasi va falsafasiga ega murabbiy. Yaqin yillar ichida Kuper jamoani yangi darajaga olib chiqishi mumkin, ammo O'zbekiston terma jamoasining bu turnirda g'olib bo'lish imkoniyatlari past. Osiyo Kubogida chempionlikka asosiy davogarlar - Janubiy Koreya, Yaponiya va Avstraliya" - deydi eronlik jurnalist.