Maydonga azaliy raqiblar Eron hamda Iroq terma jamoalari tushdilar. Bu ikki terma jamoa o'rtasidagi o'yinlar doim juda keskin o'tib kelgan. Kechagi uchrashuv guruhda kim g'olib bo'lishini hal qilishi bilan ahamiyatli edi. O'yinni kuzatish uchun stadionga 15038 nafar muxlis tashrif buyurdi. Ko'pchilik muxlislar chipta topa olmay ko'chada qolganlariniyam ko'rdik. Muxlislar o'yinning boshidan to oxiriga qadar tinmay jamoalarini qo'llab turishdi. Bu muxlislarning ko'proq qismini Eronliklar tashkil qilishdi. Muxlislar bilan to'lgan stadionda futbol o'ynash yoki hakamlik qilish bir tomondan yoqimli bo'lsa, ikkinchi tomondan futbolchi va hakamlarga yaxshigina bosimni ham yuzaga keltiradi.
OFK hakamlar qo'mitasi Eron - Iroq uchrashuvini boshqarishni Ravshan Ermatov boshchiligidagi O'zbekistonlik hakamlarga ishonib topshirdi. Ermatovga qanotlarda Jahongir Saidov hamda Abduhamidillo Rasulovlar yordam berishgan bo'lsa, darvozalar ortida Ilgiz Tantashev va Valentin Kovalenkolar xizmat qilishdi.
O'yinni bevosita stadion media tribunasida kuzatdim va albatta etiborimni ko'proq hakamlikka qaratdim. Hakamlar uchun juda og'ir o'yin bo'ldi. O'yin davomida har ikki jamoa futbolchilari va murabbiylari Ravshan Ermatovga ko'p bora bosim o'tkazishga harakat qilishdi. Futbolchilar bu uchrashuvdagi natija uchun har qanday ayyorlikka tayyor bo'ldilar. Ular o'zlarini ham raqiblarini ham ayab o'tirishmadi. Bunday o'yinlarda hakamning o'yin tizginini qo'ldan chiqarmasligi juda muhim bo'ladi. Aks holda maydonda turli ziddiyatli holatlar vujudga keladi. BAAdagi stadion media tribunasida jurnalistlar uchun monitorlar o'rnatilgan bo'lib, har bir ziddiyatli vaziyatlarni turli rakurslardan qayta namoyish qilinib borilyapti. Yonimda Somali, Iroq, BAA, Eron kabi davlatlardan kelgan jurnalistlar o'tirishdi. Bir vaziyatda to'p Iroqlik futbolchining qo'liga tekkandek bo'ldi, Ermatov esa penalti belgilamadi. Eronlik futbolchilar yoppasiga hakamga tashlanishdi. Hamyurtimiz ushbu vaziyatdan juda bosiqlik bilan chiqib ketdi. Bu holat media tribunadagi jurnalistlar orasida darhol muzokaraga sabab bo'ldi. Bilasizmi video takrorni ko'rgan barcha jurnalistlar, hatto Eronliklar ham penalti yo'q ekan, hakamga qoyil deyishdi. SHunda men Ravshan Ermatov O'zbekistondan ekanligini ularga yana bir bor eslatib qo'ydim va ichimda faxr tuyg'usi uyg'ondi.
O'yin 0:0 hisobidagi durang natija bilan yakunlandi. Hakamlar guruhi maydonni tark etar ekan har ikki jamoa bosh murabbiylari Ravshan Ermatovga minnatdorchilik bildirganlarini guvohi bo'ldim.O'yindan keyin bo'lib o'tgan matbuot anjumanida ham har ikki jamoa bosh murabbiylari hakamlar guruhi uchrashuvni yuqori saviyada boshqarganlarini takidlab o'tishdi. Ha OFK bu uchrashuvni qaysi hakamga topshirishni puxta o'ylaganligi bor gap. Ravshan Ermatov mana shunday og'ir o'yinlarda OFK hakamlar qo'mitasining joniga oro kirmoqda. Osiyoning so'nggi yillardagi tengsiz hakami, jahonning eng yaxshi hakamlaridan biri, O'zbekiston iftixori Ravshan Ermatovga kelgusi faoliyatida ham omad tilaymiz !
Akramjon Mamadaliev. Dubay shahridan maxsus.
Bosh sahifaga
349