Bu o'yinga qiziqish nihoyatda yuqori deb bemalol ayta olamiz. Maydonda juda qiziqarli bahs kechishi kutilmoqda. Xuddi biz kabi avstraliyalik hamkasblarimiz ham uchrashuvni intiqlik bilan kutishyapti. O'yin startiga oz vaqt qolayotgan bir paytda Avstraliyaning Fox Sports telekanali muxbiri Daniel Garb bilan suhbatlashdik.
- O'yindan nima kutyapsiz?
- Avstraliya O'zbekistonga nisbatan kuchliroq, ammo o'yin qiyin kechadi. Avstraliyaning himoyasida muammolar ko'p va bundan raqib foydalanib qolishi mumkin. Menga SHomurodovning o'yini yoqyapti. U juda xavfli va bitta imkoniyatdan gol ura oladi. Qolaversa O'zbekiston terma jamoasi Avstraliyaning guruhdagi raqiblaridan farq qiladi. Ikkala jamoa ham futbol o'ynashni xohlaydi. Oson bo'lmaydi, biroq bizning jamoa ancha xotirjam.
- Avstraliya g'alaba qozonishiga qanchalik ishonasiz?
- 70 foiz. Bunga avvalo futbolchilar darajasidagi farq bilan qarayapman. O'zbekiston terma jamoasida 3-4 nafar yaxshi saviyadagi futbolchi bor, lekin Avstraliyada bunday o'yinchilar ko'proq deb o'ylayman. Ammo bu ham minusga ketib qolishi mumkin. CHunki pley-off bosqichida istalgan voqeani kutsa bo'ladi.
- Avstraliya birinchi o'yinda Iordaniyaga imkoniyatni boy berganidan so'ng nima o'zgardi?
- Mag'lubiyat ikki karra ishlashga undadi. Futbolchilarning o'z kuchiga bo'lgan ishonchi ortdi. Natijada Falastin 3:0 va undan keyin Suriya 3:2 hisobida mag'lub etildi. Lekin bu o'yinlar ham oson kechgani yo'q. Ayniqsa Suriya ko'p muammo tug'dirdi. Lekin O'zbekiston bilan bahs qiziq kechadi deb o'ylayman.
- Qaysi futbolchilar o'zini ko'rsatadi deb o'ylaysiz?
- Bizdan Tom Rogich, shuningdek qanot vingerlari Ikonomidis bilan Mabil, sizlardan esa SHomurodov bilan Ahmedov deb o'ylayman.
- Guruh bosqichida ikkala jamoa ham beshtadan ko'p gol urdi. Avstraliya 6ta, O'zbekiston 7ta. SHundan kelib chiqib gollarga boy o'yin ko'rishimiz mumkinmi?
- To'g'risini aytsam, men ham shuni kutyapman. Har ikki jamoada hujumga o'tishni xush ko'ruvchi futbolchilar bor. Balki gollar ko'p bo'lar.
- Agar Avstraliya mag'lubiyatga uchrasa, bu jamoa uchun qattiq zarba bo'ladimi?
- Kutilmagan voqea bo'lishi mumkin, lekin zarba bo'ladi deya olmayman. CHunki musobaqaning guruh o'yinlaridan keeyin istalgan jamoa turnir bilan xayrlashishi mumkin. Avstraliya amaldagi Osiyo Kubogi sohibi, biroq bu musobaqaga umuman boshqa tarkib va yosh futbolchilar bilan kelgan.
- Muxlislar terma jamoangizdan nima kutishyapti?
- Hech bo'lmasa yarim finalga chiqishni. Aytib o'tganimdek, bosh murabbiy Grexem Arnold ko'plab yosh futbolchilarni olib kelgan va bu futbolchilar bilan keyinchalik jahon chempionati saralash bosqichida o'ynashni xohlaydi.
X.Xoliqov suhbatlashdi.
Bosh sahifaga
216