"Lokomotiv": Navbatdagi raqib Slovakiya U-21 termasi

Keyinroq esa 22 yanvar kuni bo'lib o'tadigan bellashuvda raqib jamoa o'zgarishi mumkinligi haqida xabar berildi.

Ertaga – 22 yanvar kuni Mirko Elichich shogirdlari aytilganidek Osiyo qitasi vakili bilan emas, balki Slovakiya U-21 terma jamoasiga qarshi o'yinda maydonga tushishadi. Bunga qadar jamoamiz G'arbiy va SHarqiy Osiyoning 1 tadan klubi bilan bellashib bo'ldi. Avvaliga Saudiya Arabistonining “Al-Ahli”si bilan, keyin esa Xitoy Superligasi ishtirokchisi “Xenan Jiane” bilan o'rtoqlik uchrashuvlari tashkil etildi. Endi navbat Evropa vakiliga etib keldi.

Slovakiyaning 21 yoshgacha bo'lgan futbolchilaridan tashkil topgan jamoasi ayni paytda Dubayda bo'lib turibdi. Evropa chempionatining final bosqichi yo'lida harakat qilayotgan Pavel Hapal shogirdlari saralash bosqichida ko'ngildagidek ishtirok etishmoqda. Gollandiya, Belorus, Turkiya, Kipr kabi termalar bilan bir guruhdan joy olgan Slovakiya 4 ta o'yindan so'ng etakchilik qilayotgani etiborga molik.

CHexiyalik mutaxassis shogirdlari saralashning 1-turini Belorus maydonida o'tkazib, 0:1 hisobida imkoniyatni boy berishandi. 2-turga kelib esa guruh autsayderi Kiprni 2:0 hisobida taslim etishdi. Guruhda ikkinchi o'rinda borayotgan, Belorus va Turkiya kabi mamlakatlarni mag'lub eta olgan Gollandiya Slovakiyadan har ikki uchrashuvda ham engilgan: Amsterdamda 1:3, Bratislavada esa 2:4 hisoblarida.

Jamoamiz Slovakiya bilan o'yinning ertasiga Toshkentga qaytib keladi. Ayni paytda CHernogoriya hamda Serbiyadan tashrif buyurgan legioner futbolchilar ko'rikda bo'lib turishibdi. Hujum chizig'i vakillarining “Lokomotiv”dagi kelgusi taqdirlariga delegaciyamiz ortga qaytganidan so'ng aniqlik kiritib o'tamiz.