Akbar To'raev: "Dubaydagi yig'in yaxshi boshlandi"

Kuni kecha "qaldirg'ochlar" Rossiya premer-ligasida ishtirok etayotgan "Anji" klubiga qarshi o'rtoqlik uchrashuvini o'tkazib 3:2 hisobida zafar quchishdi. Biz "Bunyodkor" darvozaboni Akbar To'raev bilan bog'lanib yig'in va "Anji"ga qarshi bahs haqidagi fikrlari bilan qiziqdik.

"Dubaydagi yig'in rejaga ko'ra boshlandi. Kuniga 2 mahal mashg'ulot o'tkazayapmiz. Ertalabki mashg'ulotlar asosan qumda bajarilmoqda, jismoniy holatni yaxshilashga etibor qaratilmoqda. Kechki payt "Al SHaab" akademiyasiga qarashli maydonda shug'ullanayapmiz. Taktika mashg'ulotlar o'tkazilmoqda. Tarkibda hech qanday yo'qotish yo'q, barcha sog'-salomat. Barcha mashg'ulotlarda bor kuchi bilan ishlamoqda".

"Anji" bilan o'yinga kelsak murabbiylar bu o'yinda barcha futbolchilarga imkon berishdi. Har bir bo'limda ikki xil tarkib o'ynadi. Menimcha o'yin yomon bo'lmadi. Murabbiylarning ko'rsatmalarini bexato bajarishga urindik. Quvontirayotgani yoshlar ham jamoaga tezda qo'shilib keta olishdi. Ular ham asosiy tarkibga loyiq ekanliklarini ko'rsatishmoqda. Oldinda yana 5ta nazorat o'yini bor. Barcha etibor 9 fevral kungi "Al SHabab"ga qarshi o'tadigan pley-off o'yiniga qaratilgan", - deydi Akbar To'raev.