Alisher Nikimbaev "Turg'unboev ishi" haqida o'z fikrini bildirdi

Demak Turg'unboev ishi ko'rib chiqildi, qaror qabul qilindi. Yakunlar mana bunday:
1. Futbolchi diskvalifikaciya qilindi
2. Uning ikkala klub bilan shartnomalari bekor qilindi
3. Ikkala klub vakillari va "Navbahor" sobiq ustozi Ilhom Mo'minjonov diskvalifikaciya qilindi
Qarorga u qadar to'xtalib o'tirmaymiz va shunchaki bu ishda kim yutganiyu, kim yutqazganini aytib o'tamiz.

G'OLIBLAR
1. "Navbahor". Namagan klubi o'tgan yil o'z futbolchisi uchun kurashda yutqazgandi, ammo "Paxtakor" bilan muzokara o'tkazmasdan boshqa yo'llarni ishga soldi (O'FA saytiga ko'ra, Turg'unboev 3 dekabr kuni "Navbahor" tomonidan bosim bo'lganini aytgan) va "Paxtakor" bilan tuzilgan shartnomani bekor qildira oldi. Endi diskvalifikaciya muddati tugagach "Navbahor" katta ehtimol bilan Turg'unboev bilan yangi shartnoma tuzadi. "Paxtakor"ga hech qanday tovon puli to'lamaydi.
2. Turg'unboev. Ha, u diskvalifikaciya qilindi. Ammo ikkita jamoa bilan shartnoma tuzgach jazolanmay qolmasligi mumkin emasdi. Diskvalifikaciya 9 iyul kuni tugaydi, bu esa 6 oydan kamroq. Agar Turg'unboev ishtirok etgan so'nggi rasmiy o'yindan (21 yanvar kuni Osiyo Kubogida Avstraliyaga qarshi) boshlab hisoblasak ham 6 oy bo'lmayapti. U "Paxtakor" bilan shartnomasini aynan Osiyo Kubogidan so'ng bekor qilishni istadi va "Navbahor" bilan yig'inga Qrimga ketdi. Turg'unboev belgilanganidan kamroq diskvalifikaciya olgani uning omadi.

YUTQAZGANLAR
1. "Paxtakor". Toshkent klubi qonuniy ravishda shartnoma tuzgan, O'FA va OFK tomonidan ro'yxatdan o'tkazgan futbolchisidan ayrildi. Bundan tashqari shartnoma endi bekor qilindi va futbolchi hech qanday tovon pulisiz boshqa klubga ketishi mumkin.

Futbolchi 3 dekabr kuni PFL/O'FAga ariza bilan murojaat qilgan va "Navbahor" tomonidan bosim bo'layotganini aytgan hamda "Paxtakor"da o'ynash istagi borligini malum qilgan (har holda O'FA saytida shunday yozilgan). Ammo ikki oy ichida bosim kamaymagan shekilli va futbolchi shartnomani buzish darajasigacha borgan. Endi kim O'FAning himoya qilamiz degan gaplariga ishonadi? Turg'unboev murojaat qilgandi, barchasi nima bilan tugadi?, - deb yozadi Nikimbaev telegramdagi o'z kanalida.