Nodirbek To'ychiev: "Andijon futboli muxlislar uchun"

Ushbu uchrashuvda “Andijon” jamoasining fidoyi muxlislari ham ishtirok etishdi. Viloyat rahbarining futbolchilar bilan bo'lgan uchrashuvidan keyin “Andijon” fan-klubi raisi Nodirbek To'ychiev o'z fikrlarini bildirib o'tdi.

- Avvalo viloyatimiz hokimiga “Andijon” jamoasiga bo'lgan etibori uchun muxlislar nomidan minnatdorchilik bildiraman. Mavsumga tayyorgarlik paytida viloyat rahbarini jamoa holidan xabar olishi albatta, futbolchilarning kayfiyatini ko'taradi. Viloyatimiz hokimi klub mutasaddilari, murabbiylar va futbolchilarga ishonch bildirmoqda va jamoani har taraflama qo'llab-quvvatlashini aytib o'tdi. Bundan biz muxlislar ham xursand bo'ldik.
Yangi mavsumda “Andijon” jamoamiz yangi rahbariyat va murabbiylar bilan ish boshlamoqda. Bu borada klub prezidenti Zafar Ahmedovich Zulunov, vice-prezident Marufjon Abdusalomov, klub direktori Bekzodbek Karimov, shuningdek, bosh murabbiy etib tayinlangan Nozim Mullaoxunovlarga yaxshi niyatda boshlagan ishlariga omad tilaymiz. Jamoa fan-klubi raisi sifatida shuni aytamanki, biz muxlislar ularni hamisha qo'llab-quvvatlaymiz. Hammamiz bir tanu bir jon bo'lib, birgalikda bo'laylik. 

Jamoaga tajribali mutaxassis Usmon Toshevni maslahatchi murabbiy sifatida ishlashi haqida gapirilmoqda. Bu murabbiy so'nggi yillarda OFK yo'riqchisi sifatida o'z malakasini oshirib bormoqda. Agar Toshev jamoamizda maslahatchi murabbiy bo'lib ishlaydigan bo'lsa, “Andijon” uchun foydali bo'lishiga ishonamiz.

Ayni paytda jamoamizning yangi mavsumga tayyorgarligi qizg'in pallaga kirgan. Jamoada Anvar Berdievdek futbolchi borligidan xursandmiz va tarkibga yana 5-6 nafar mahoratli o'yinchilar qo'shilsa, jamoada raqobat yanada ortadi. Bundan tashqari, birinchi ligada viloyatimiz sharafini himoya qiladigan “UzDongJu” jamoasidan ham iqtidorli bolalar “Andijon” safiga qo'shilishgan. Ikki-uch yil ichida jamoamizdan ham mahalliy yaxshi o'yinchilar chiqishiga ishonamiz. SHuningdek, “Andijanka” ayollar jamoasini ko'tarilishida o'z hissasini qo'shayotgan Marufjon Abdusalomovni “Andijon” klubida ham ish boshlashi biz muxlislarni xursand etdi. Ishonamizki, Abdusalomov “Andijon” jamoamizni ham rivojlanishiga o'z hissasini qo'shadi. Eng asosiysi hammamiz bir yoqadan bosh chiqarib, ahillikda ishlaylik. “Bobur yurti Andijon, biz senga beramiz jon”!