Quyida ushbu intervyuning to'liq matni bilan tanishishingiz mumkin.
Futbolga qanday kirib kelgansiz?
Dastlab Marg'ilon shahrida futbol to'garagida ishtirok etganman, futbol haqidagi ilk tasavvurlarim aynan shu to'garakda shakllangan. Keyinchalik akam meni o'ziga tanish bo'lgan futbol murabbiylari yoniga olib borgan. Bu erda taniqli murabbiy Murod Ismoilov va boshqa murabbiylar qo'l ostida mashg'ulotlarda ishtirok etganman. Oradan bir yil o'tgach, Valeriy Vladimirovich Sidinov keldi, va u kishidan futbol sir-asrorlarini o'rgandim. 2006 yil "Paxtakor" futbol akademiyasiga borib qo'shildim.
Faoliyatingiz davomida qaysi jamoalar safida o'ynagansiz?
Dastlab "Paxtakor" jamoasi o'rinbosarlar tarkibida o'ynadim, keyin "Zarafshon"da, 2014 yilda yana "Paxtakor" o'rinbosarlari jamoasida, 2015 yilda "Zomin"da o'ynadim. 2016-2018 yillarda "Neftchi" jamoasi safida to'p surdim. 2018 yilgi mavsum yakunlangach, menga bu yil Superliga yo'llanmasini qo'lga kiritgan "Andijon" jamoasidan chaqiruv bo'ldi va borib bu jamoa mashg'ulotlarida ishtirok etdim, yakunda klub bilan bir yillik shartnoma imzoladik.
Siz muxlislik qiladigan xorij futbol klubi va eng kuchli futbolchi kim?
O'zim "Manchester Yunayted" klubi muxlisiman. Eng kuchli futbolchi men uchun Ronaldino. Hozirgi kunda o'ynayotgan futbolchilar ichida esa Krishtianu Ronaldu.
O'z futbolchilik faoliyatingizdan kelib chiqib aytadigan bo'lsak, qaysi murabbiylar sizda iliq taassurot qoldirgan?
O'zimni faoliyatimda Valeriy Vladimirovich Sidinov, Murod Ismoilov va SHuhrat Rahmonqulovning xizmatlarini beqiyos baholayman.
Kelajakdagi rejalaringiz...
Yangi mavsumda "Andijon" jamoasi safida Superliga uchrashuvlarda munosib ishtirok etib, jamoa g'alabalariga o'z hissamni qo'shaman degan umiddaman. Nasib qilsa kelajakda O'zbekiston milliy terma jamoasi safida o'ynash, shuningdek xorij chempionatlarida o'zimni sinab ko'rish kabi maqsadlarim bor.
Muxlislarga tilaklaringiz...
Birinchi navbatda "Neftchi" jamoasi muxlislariga o'z minnatdorchiligimni izhor qilaman. "Neftchi" muxlislari har doim bizni qo'llab-quvvatlab kelishgan, ularga har qancha rahmat aytsak arziydi. Umuman barcha o'zbek futbol muxlislari biz kabi futbolchilar uchun judayam qadrli.
Bekzod Tolibov suhbatlashdi
Bosh sahifaga
133