Mirjalol Qosimov: "Eng yomon o'yinimizni o'tkazdik"

- "Lokomotiv" jamoasini haqqoniy g'alaba bilan tabriklayman. Birinchi bo'limda jamoamiz umuman futbol o'ynamadi. Og'ir o'yin va uzoq parvoz futbolchilarga tasir qildi deb o'ylayman. Ikki xil taymga guvoh bo'ldik. Lekin tanaffusdan keyin uyg'onganimizda poezd ketib bo'lgandi. Sovrin yutish uchun zo'r imkoniyat paydo bo'lgandi. Biroq futbolchilarni tiklanish jarayonini yaxshi o'tkaza olmaganimiz pand berdi. Hayot davom etadi.

Jamoamizda faqat Jasur Hasanov o'ynamaydi. Futbolni jamoaviy o'ynaladi. Bizda yangi jamoa, futbolchilar o'zaro til topishishi, chiziqlar orasidagi bog'lamlar ishlashi uchun malum vaqt kerak bo'ladi. Birinchi bo'limda jamoamiz tomonidan deyarli hech qanday harakat bo'lgani yo'q. Bugungi o'yindan to'g'ri xulosa chiqaramiz. Har bir uchrashuv bizga ozuqa beradi.

Himoyadagi muammolar? CHempionatgacha yangi futbolchilar kelishi yoki kelmasligini vaqt ko'rsatadi. Yangi futbolchilarni olish imkoniyati past. CHunki juda ham qisqa fursat qoldi. Hozircha uchta o'yin o'tkazdik. Agarda ularni taqqoslaydigan bo'lsak, bugun eng yomon uchrashuvimiz bo'ldi. Himoyachilarimizning barchasi boshqa-boshqa jamoalardan kelishgan. O'zaro o'yin ko'nikmasi paydo bo'lishi uchun amaliyot va vaqt kerak bo'ladi. CHempionatga qadar mazkur muammolarni bartaraf etishga harakat qilamiz.

CHempionat boshlangunga qadar bu mag'lubiyatlarni ko'tarib yurish oson emas. Hozirgina kiyinish xonasida ham yigitlarga bugun shohsupada sizlar bo'lishlaringiz mumkin edi deya aytdim. O'z muxlislarimiz oldida noqulay holatda qoldik. Bu mag'lubiyatlar bizni chempionatga yanada yaxshiroq va jiddiyroq tayyorgarlik ko'rishimizga undaydi.