"Qizilqum": Mashg'ulotlar Farg'onada davom etmoqda

Bosh menejer Hamidjon Aktamov rahbarligida kuniga ikki mahaldan mashg'ulotlar olib borilyapti. “Istiqlol” sport majmuasida uyushtirilayotgan mashg'ulotlarda murabbiylar Yuriy Lukin, Akmal Xoliqovlar o'ttiz nafarga yaqin futbolchini ko'rikdan o'tkazishyapti.

- O'zbekiston XXV milliy chempionati bahslari boshlanishiga tobora oz fursat qolmoqda, - deydi“Qizilqum” PFK bosh menejeri Hamidjon G'ulomovich. - Ikki bosqichda Navoiy shahrida tashkil etilgan o'quv-mashg'ulot yig'inida ko'proq futbolchilarimizning jismoniy tiklanishiga etibor qaratildi. Endi esa ko'proq sinov-nazorat uchrashuvlarida maydonga tushishga harakat qilamiz. Bu jamoa o'yin uslubini shakllantirish bilan birgalikda tarkibga yangi qo'shilayotgan yigitlarni ko'rikdan o'tkazishimizda juda asqotadi.

Yangi mavsum oldidan jamoa tarkibini deyarli to'liq saqlab qolishga harakat qildik. O'tgan mavsumda ijara asosida "Qizilqum" da o'ynagan Navro'zbek Alimov (“Paxtakor”) o'z jamoasiga qaytib ketgan. Yosh darvozabonimiz Dilshod Hamroev “Bunyodkor” jamoasida o'z omadini sinab ko'rish istagani bildirdi. Yarim himoyachi Farrux Haydarov ham hozirda boshqa jamoada ko'rikdan o'tmoqda. Faxriy futbolchilardan biri Asqarjon Muhiddinov oxirgi mavsumni jarohat bilan yakunladi. U futbolchilik faoliyatini tugatish arafasida.

Oxirgi mavsumning birinchi davrasida hujumchi Bahriddin Vahobov bilan o'ziga xos tandem hosil qilgan ukrainalik Vyacheslav SHevchenkoning tarkibimizga qo'shilgani bizni xursand qildi. SHuningdek, Alisher Yusupov, Ilhom Yunusov (“Nasaf”), Samandar SHodmonov (“SHo'rtan”)larning yangi mavsumda jamoamizga  yordami tegishidan umidvormiz. Jamoamizda selekciya ishlari davom etmoqda. Farg'onadagi yig'in davomida mashg'ulotlarda murabbiylarimiz yana bir qator yangi o'yinchilarni ko'rikdan o'tkazishni rejalashtirishgan.

Eslatib o'tamiz, “Qizilqum” futbolchilari 26 yanvar kuni “Andijon” jamoasi bilan nazorat uchrashuvi o'tkazadi. Bu o'yin soat 15.00 da Farg'onadagi “Markaziy” stadionda boshlanadi.