Rustam Mirsodiqov: "Hisob bundan-da yirikroq ko'rinishda ham bo'lishi mumkin edi..."

Rustam Mirsodiqov, “Metallurg” FK bosh murabbiyi: - “Paxtakor” bizning eng noqulay raqibimiz. Bu jamoaga qarshi futbolchilarni har safar ham ruhan, ham jismonan tayyorlaymiz. Mashg'ulotlarda yigitlar barchasini bekamu ko'st ado etishadi, biroq o'yinda maydonga chiqishganida kamchiliklar, nuqsonlar ko'payib ketadi. Birinchi davrada – Toshkentda o'tkazilgan o'yinni yodga oling. Kamida durangga erishishimiz kerak bo'lgan o'yinda mag'lubiyatga uchraganmiz. Bu safar yigitlarga katta rahmat. O'zlarini yo'qotib qo'yishmadi.

Bor kuch va mahoratlarini ishga solib, to'qson daqiqa davomida tashabbusni raqibga bermaslikka harakat qilishdi. Masuliyatni hamma birdek his etdi, shu boisdan ham kerakli natijani qo'lga kiritdik. Hisob bundan-da yirikroq ko'rinishda ham bo'lishi mumkin edi, agar o'yinchilarimiz barcha imkoniyatlardan unumli foydalanishganida. Asosiysi g'alaba qozondik va taqibchilarimizdan biroz uzoqlashib olishga erishdik. SHu kuni stadionda bizni qo'llab-quvvatlab turgan muxlislarimizga ham minnatdorchilik bildiraman, barcha futbol ishqibozlarini esa yaqinlashib kelayotgan Qurbon hayiti bayrami bilan tabriklayman, deydi Rustam To'xtamurodovich.

"Metallurg" matbuot xizmati