Ushbu o'yinlarda "Bunyodkor" stadioni maysasi holati ko'pchilikning etiborini tortgani bor gap. Sentyabr oyidan boshlab ushbu stadionda O'zbekiston milliy terma jamoasi Jahon chempionati saralash o'yinlarini o'tkazishni boshlaydi. Juda ham muhim bahslardan oldin maydon holati ideal bo'lishi kerak. Birinchi davrada bu stadionda "Bunyodkor"dan tashqari "Buxoro" ham uy o'yinlarini o'tkazdi. Ikkinchi davrada esa "Bunyodkor" bilan birga "Lokomotiv" o'z uy o'yinlarini o'tkazishni boshladi. "Paxtakor" ham Elit Osiyo chempionlar ligasi doirasidagi o'yinlarni shu maydonda o'tkazadi.
Maydonning holatini bilish uchun "Bunyodkor" stadioni bosh direktori SHerzod Haqberdiev bilan bog'landik.
"Bilasiz stadion ichida havo aylanmaydi, havo ham 45 daraja issiqdan pastga tushmadi. O'tgan yil yozgi chilladan keyin ham shunday holat kuzatilgandi. Havo harorati pasaygach, barchasi o'z joyiga tushadi va maydon yana o'z holatiga qaytadi. Ayni paytda stadion xodimlari yordamida maydon ichida mikroiqlim yaratdik. Bunda suv maysa ustiga kuchli shamol orqali sepiladi.
Esingizda bo'lsa, ikki yil avval maydonimizga suniy chim ekilgandi. Qoidasi bo'yicha bunday stadionlarda bir yilda bir marta suniy maysaning usti tozalanib turishi va tabiiy maysa uchun urug' ekish kerak. Urug' ekish uchun eng qulay muddat bahor yoki kuz fasli. O'tgan yil bizda vaqt bo'lgandi shuni amalga oshirgandik. Bu yil esa vaqt etarli bo'lmadi va hozirgacha tozalov ishlarini amalga oshira olmadik. Nasib qilsa rejamiz bo'yicha noyabr oyida tozalash va urug' ekish jarayonini amalga oshiramiz.
Albatta tabiiy maydonda tez-tez o'yinlar o'tkazlishi ham maysa sifatiga tasir qilmasdan qolmaydi. SHunga qaramay, stadion bo'lajak muhim o'yinlarda ideal holatda bo'lishi uchun bor kuchimiz bilan ishlayapmiz", - dedi "Bunyodkor" stadioni bosh direktori SHerzod Haqberdiev.
Bosh sahifaga
428