O'zbekiston futbol hakamlari markazi mazkur uchrashuvlar tugagach, Ekspert-hakamlar komissiyasining navbatdagi yig'ilishini o'tkazdi va undagi bahsli vaziyatlar tahlil qilindi. Bu bellashuvlarda jami 5 ta bahsli vaziyat yuzaga keldi.
Quyida ularning batafsil izohi va chiqarilgan yakuniy qarorlar bilan tanishishingiz mumkin:
1-vaziyat. Pro liga, "Buxoro" - "Xorazm" bahsi: qizil kartochka.
"Buxoro" - "Xorazm" uchrashuvining 37-daqiqasida mehmonlarning 10-raqamli azosi raqibining tana qismiga mushti bilan zarba berdi. Bosh hakam Doston Mirzarayimov bu vaziyatda futbolchiga darhol qizil kartochka ko'rsatdi.
Ekspert-hakamlar komissiyasi qarori: Mazkur holatda futbolchi mezbonlar vakiliga nisbatan atayin qo'pol harakat qilgan va bunday hollarda to'g'ridan-to'g'ri qizil kartochka ko'rsatish uchun asos mavjud. Ekspert-hakamlar komissiyasi hakamning qarorini to'g'ri, deb hisoblaydi.
2-vaziyat. Pro liga, "Aral" - "Qo'qon-1912" qarama-qarshiligi: bahsli vaziyat.
"Aral" - "Qo'qon-1912" uchrashuvining 17-daqiqasida mezbonlarning 20-raqamli futbolchisining qo'liga to'p tegdi. Bosh hakam SHavkat Nasibullaev to'p qo'lga tabiiy tarzda tekkanini takidladi va bahsni davom ettirdi.
Ekspert-hakamlar komissiyasi qarori: Bu vaziyatda mezbonlar azosi to'pni qo'li bilan o'ynagan va to'p yo'nalishining o'zgarishiga sababchi bo'lgan. Ushbu jarayonda qo'l bilan o'yin qayd etilishi lozim edi. Ekspert-hakamlar komissiyasi tomonidan hakamning qarori noto'g'ri, deb topildi.
3-vaziyat. Pro liga, "Aral" - "Qo'qon-1912" qarama-qarshiligi: bahsli vaziyat.
"Aral" - "Qo'qon-1912" uchrashuvining 60-daqiqasida mehmonlarning 18-raqamli futbolchisi raqibiga nisbatan qo'pollik ishlatdi. Bosh hakam SHavkat Nasibullaev jarima zarbasi belgiladi, ammo futbolchiga sariq kartochka ko'rsatmadi.
Ekspert-hakamlar komissiyasi qarori: Bu vaziyatda qo'qonliklar vakili istiqbolli hujumni to'xtatib qolgan. Mazkur holatda futbolchi sariq kartochka bilan jazolanishi kerak edi. Ekspert-hakamlar komissiyasi tomonidan hakamning qarori noto'g'ri, deb topildi.
4-vaziyat. Pro liga, "Aral" - "Qo'qon-1912" o'yini: bahsli 11 metrlik jarima zarbasi.
"Aral" - "Qo'qon-1912" uchrashuvining 62-daqiqasida mezbonlarning 27-raqamli futbolchisi raqib jarima maydoniga yorib kirdi, ammo unga himoyachilar qarshilik ko'rsatdi. Bosh hakam SHavkat Nasibullaev vaziyat penaltiga tortmasligini malum qildi va bahsni davom ettirdi.
Ekspert-hakamlar komissiyasi qarori: Bu vaziyatda penalti belgilash uchun dalil mavjud emas. Kadrlar orqali jarayon ochib berilmagan. SHu sababdan, komissiya mazkur holatda hakamlarni qo'llab-quvvatlaydi va qarorni to'g'ri, deb topdi.
5-vaziyat. Pro liga, "Aral" - "Qo'qon-1912" qarama-qarshiligi: sariq kartochka.
"Aral" - "Qo'qon-1912" uchrashuvining 90+2-daqiqasida ikki jamoa vakillari o'rtasida to'p uchun kurash kechdi va yakunda qo'pol harakati uchun bosh hakam SHavkat Nasibullaev ikkala futbolchiga ham sariq kartochka ko'rsatdi.
Ekspert-hakamlar komissiyasi qarori: Bu vaziyatda mezbonlar vakili raqibiga nisbatan ochiqchasiga o'yin qoidasini buzgan. Mehmonlar azosi esa sportchiga xos bo'lmagan xatti-harakat amalga oshirgan. Ekspert-hakamlar komissiyasi tomonidan hakamning qarori to'g'ri, deb topildi.
Bosh sahifaga
193