O'yin haqida
- Avvalambor, "Andijon" muxlislarini g'alaba bilan tabriklayman! Yigitlarga jangovar o'yin uchun katta rahmat! O'tgan o'yinda jamoada o'yin sifati bor edi. Bugungi o'yin bilan o'tgan o'yinni solishtirib bo'lmaydi, lekin futbolda muhimi – natija, bugun muhim g'alabani qo'lga kiritdik. "Surxon"ga keyingi o'yinlarda omad tilab qolaman.
- Edgar Bernxardt va Martin Boakini almashtirdingiz. Ularning o'yinidan qoniqdingizmi? Muxlislarda ularga nisbatan etiroz ko'p bo'ldi.
- Edgar qishki yig'in davomida o'zidan yaxshi taassurot qoldirdi. Uni olib qolishga qaror qildik. Bilmadim, nima sababdan o'yini ochilib ketmayapti, bu borada u bilan gaplashib olamiz.
Martin bo'yicha fikr bildirsam, u yomon hujumchi emas. Faqat bitta nuqtani qo'yib olishi kerak. Hujumchi o'z-o'ziga yaxshi vaziyatlar hosil qilishi kerak. U jamoaga yangi kelib qo'shildi, endigina 10 kun bo'ldi. Xudo xohlasa hali chempionat davomida o'zini ko'rsatadi.
- O'tgan yildan beri o'yin tashkil qilish masalasida o'zingiz istagan jamoani tuza oldingizmi? Buni foiz bo'yicha hisoblasak, necha foizni tashkil etadi?
- O'yin tashkil etishda 30% deya olaman. Sababi – jamoaga yangi kelganlar chempionat boshlanishiga oz qolganda safimizga qo'shilishgan. Jumladan, Jaloliddinov, Dimov, Ismoilov, Boaki o'quv-mashg'ulot yig'inining birinchi qismida ishtirok etmagan. Bu endi o'yindan o'yinga bartaraf qilinadi. O'ylashimcha, 2-3 turdan keyin 80%ga men xohlagan futbolni namoyish qila boshlaymiz. Bugungi o'yinda bosim kuchli bo'ldi, ko'plab futbolchilarimiz yosh, hali bunday atmosferada o'ynashmagan.
- O'yinda asosan, qanot futbolchilarimiz xatolikka yo'l qo'yishdi. Bunga nima deysiz?
- Menimcha, chap qanot himoyachimiz(Abdug'ani Kamolov)ni aytyapsiz. Aslida o'ylagan rejamiz boshqacha edi, nimaga deganda, tajribali o'yinchimiz Ibrohim Otaxonov qanotda yordam berishi kerak edi. Kamolov bilan bog'liq holat sekin-sekin o'nglanib boradi, U Olimpiya terma jamoamizga nomzod sanaladi.
- Birinchi goldan keyin "Andijon" sustlashdi. Nega bunday bo'ldi?
- To'g'ri, ozgina pala-partishlik bo'ldi, to'p nazoratini boy berdik. Ammo ahamiyat bergan bo'lsangiz, 75-daqiqadan keyin yana ustunlikka ega chiqib oldik, bir nechta vaziyatlarni yaratdik. Menimcha, bugungi futbol muxlislarga manzur keldi.
Bosh sahifaga
251