- O'zbekiston futzal milliy terma jamoasi Evropada yig'in o'tkazdi. Yig'in davomida Angola, Portugaliya va Franciyalarga qarshi nazorat uchrashuvida ishtirok etdik. Ushbu yig'in haqida batafsilroq gapirib bersangiz?
- Nazorat uchrashuvlari bizga Evropa jamoalari bilan darajamiz qanchalik farq qilishini bilib olish uchun xizmat qildi. SHuningdek, o'yinning qaysi jihatlarini yanada yaxshilashimiz kerakligini bilib oldik, himoyani yanada mustahkamlashimiz kerak.
- Nazorat uchrashuvlarining birida terma jamoamiz kutilmaganda Angolaga yirik 1:6 hisobida mag'lub bo'ldi. Uchrashuv yopiq tarzda o'tkazilgani uchun, o'yin haqida ko'p malumotlarga ega bo'lolmadik. Balki Angola terma jamoasi haqiqatdan ham ancha kuchli jamoa bo'lishi mumkin. Angoladan uchragan mag'lubiyatga izoh berib o'tsangiz?
- Angola terma jamoasi ham Jahon chempionatida ishtirok etadi. Bu bejizga emas. Jamoaning oltita futbolchisi individual tomonlama juda kuchli. SHuningdek, uch nafar futbolchisi Portugaliya chempionatida to'p tepishadi. Jamoa bosh murabbiyi ham Portugaliyalik. Angola terma jamoasi zamonaviy futzal haqida to'liq tasavvurga ega jamoa. Bu o'rtoqlik uchrashuvi bo'lganini ham unutmaylik, bunday o'yinlarda biz ko'p tavakkalga qo'l uramiz. Angolaga qarshi juda ko'p eksperimentlar qildik. Raqib esa asosan himoyada harakat qildi va bizning xatolirimizdan unumli foydalandi. O'yindan o'zimizga kerakli xulosalarni chiqarib oldik va ikkinchi uchrashuvda ko'proq himoyaga tayanib o'ynadik. Angolaga qarshi kechgan ikkinchi uchrashuvda esa g'alaba qozonganimizdan xabardor bo'lsangiz kerak.
- Afsuski, terma jamoamizda yo'qotishlar soni ko'payib bormoqda. Portugaliyada ikki nafar futzalchimiz Ravshan Eliboev va Sunatilla Jo'raevlar jarohat olishdi va Jahon chempionatini o'tkazib yuboradigan bo'lishdi. Davron CHoriev, Ravshan Eliboev, Sunatilla Jo'raev kabi terma jamoamizning muhim futzalchilari mundialga bizga yordam bera olishmaydi. Yo'qotishlar bizga qanchalik tasir qilishi mumkin?
- Eng asosiysi hozirgi kunda tarkibimizda bor futbolchilardan maksimal tarzda foydalanish va himoyamizni yanada yaxshilash.
- Jahon chempionati boshlanishiga ikki hafta vaqt qoldi. Terma jamoamiz so'nggi yig'inga kirishdi. Keyin esa Braziliyaga qarshi o'yinlar. Mundial oldidan o'tkazilayotgan so'nggi yig'in haqida gapirib o'tsangiz?
- So'nggi yig'inda o'zimiz uchun kerakli bo'lgan detallar ustida ishlashni maqsad qilganmiz. Braziliya terma jamoasiga qarshi o'tkaziladigan ikkita o'rtoqlik uchrashuvi bizga juda foydali bo'ladi degan umiddaman, sababi Braziliya juda kuchli terma jamoa hisoblanadi. Braziliya albatta ko'proq hujum qilishga harakat qiladi, bu esa bizga ko'proq himoyada o'ynash imkoniyatini beradi. Braziliyaga qarshi uchrashuvlarda grand terma jamoalarga qarshi himoyada qanday to'g'ri o'ynash kerakligini o'rganib olamiz.
- Biroz terma jamoamiz mavzusidan chetlashsak, bosh murabbiylik faoliyatingiz davomida uch marotaba Jahon chempionatlarida ishtirok etgansiz va ikki marotaba Ispaniya terma jamoasi bilan mundial finaliga qadar etib borgansiz. Yaqinlashib kelayotgan Jahon chempionatidan shaxsiy kutilmalaringiz qanday? Balki shaxsiy maqsadlaringiz bordir?
- Bu mening to'rtinchi Jahon chempionatim bo'ladi. Imkon qadar uzoqroq ishtirok etishga harakat qilamiz. Dastlabki maqsadimiz guruhdan chiqish, lekin realist bo'lishimiz ham kerak. Final uchrashuvida ishtirok etish degan katta maqsadni aytish mumkin, ammo uni bajarish juda qiyin. Vaziyatni to'g'ri baholagan holda o'z imkoniyatlarimizdan kelib chiqib maksimal natija qayd etishga harakat qilamiz.
Abdulvosit Bektemirov suhbatlashdi
Bosh sahifaga
403