Ushbu saralash bahslari yakunlangach O'zbekiston terma jamoasi bosh murabbiyi Farhod Nishonov championat.asia saytiga intervyu berdi.
"Dastlabki uchta o'yinni yirik hisobda yutganimizdan keyin ham bo'shashmadik. Sababi yo'llanmaga ega chiqmagandik. Bahraynga qarshi uchrashuvdan oldin raqiblarda ham imkoniyat bor edi. Yirik g'alabalar tufayli chetdan qaraganda barchaga Osiyo kubogi yo'llanmasi oson qo'lga kiritilgandek tuyulishi mumkin. Lekin yigitlar mashg'ulotlar va maydon tashqarisida qanday sabrli bo'lishganini o'zim guvohi bo'ldim. Bu erdagi ovqatlar halol emasligi uchun yigitlar ularni tanovul qilishmadi ham. Bundan tashqari mashg'ulotlar ham, o'yinlar ham suniy maydonlarda o'tkazildi. To'g'ri jarohatlar bo'lmadi, lekin futbolchilarimizning oyoqlarida og'riqlar bor va ko'karishlar ko'rinib turibdi. Yigitlar Xitoy Taypeyidagi ob-havoga ham ko'nikishdi. Bu erda namlik juda ham yuqori bo'lganini barcha ko'rdi deb o'ylayman.
Yana bir narsani alohida takidlash lozim. Bu saralash musobaqasi FIFA kunlarida o'tmadi. SHu bois Superliga klublari murabbiylariga katta rahmat aytmoqchiman. Barcha murabbiylar o'z futbolchilarini terma jamoaga qo'yib yuborishdi. 1 oy davomida yigitlar terma jamoada bo'lishdi va bizga katta yordam berishdi.
Keyingi rejalarimizga kelsak Osiyo kubogiga tayyorgarlik ko'ramiz. Saralashdagi o'yinlarimizni kuchaytirishimiz shart. Raqiblar ham bizni o'rganishni boshlashadi. O'z o'yin uslubimizni o'zgartirmagan holda individual tarzda yigitlar o'sishi kerak. O'FA xalqaro bo'limi Argentina va Urugvay terma jamoalari bilan muzokara o'tkazishmoqda. Argentina bilan viza bo'yicha muammo bo'lmoqda. Agar barchasi yaxshi ketsa oktyabr oyidagi FIFA kunlarida shu ikki davlat terma jamoalariga qarshi o'rtoqlik uchrashuvlari o'tkazamiz. Fevral oyidagi Osiyo kubogiga qadar yana yig'inlar va o'yinlar o'tkazamiz", - dedi Farhod Nishonov championat.asia saytiga bergan intervyusida.
Bosh sahifaga
344