O'zbekiston milliy terma jamoasi ertaga "Bunyodkor" stadionida Eronga qarshi o'yin o'tkazadi. JCH-2026 uchinchi saralash bosqichidan o'rin olgan bu uchrashuv terma jamoamiz uchun uchinchi bahs bo'ladi. Dastlabki ikki uchrashuvda terma jamoamiz KXDR va Qirg'iz Respublikasini bir gol farqi evaziga mag'lub etgandi. Eronga qarshi o'yin oldidan so'nggi uchrashuvga biroz to'xtalsak. Qirg'iziston poytaxti Bishkek shahrida Qirg'iz Respublikasiga qarshi JCH-2026 uchinchi saralash bosqich 2-tur uchrashuvini o'tkazgandi. Gollarga boy kechgan uchrashuvda terma jamoamiz 3:2 hisobidagi irodali g'alabaga erishdi. O'yin davomida ikki marotaba hisobda ortda borayotgan terma jamoamiz yakunda chiroyli g'alabaga erishdi. G'alaba goliga esa Oston Urunov mualliflik qildi. SHunday qilib, O'zbekiston milliy terma jamoasi JCH-2026 saralashi uchinchi bosqichining "A" guruhida dastlabki ikki tur uchrashuvlaridan so'ng yuz foizlik natija qayd etgan holda guruh etakchisi bo'lib turibdi.
Dolen Omurzakov nomidagi stadionda o'tkazilgan uchrashuvga biroz to'xtalsak. Qirg'iziston birinchi turni safarda Eronda o'tkazgan va kichik hisobda mag'lub bo'lgan edi. Kichik hisobdagi mag'lubiyatga qaramay, Qirg'iz Respublikasi vakillari yaxshi o'yin namoyish etgan va raqib darvozasi oldidan ko'plab xavfli vaziyatlar yaratgandi. Dastlabki uchrashuvdagi mag'lubiyatdan so'ng ikkinchi bahsda ham ochko yo'qotish yoki mag'lub bo'lish, imkoniyatlarni keskin pasaytirib yuborishi aniq edi. SHu sababli Qirg'iziston terma jamoasi ikkinchi tur bahsida imkon qadar mag'lub bo'lmasligi kerak edi. Ustiga-ustak yangi rekonstrukciya qilingan stadionning ochilishi va mamlakat prezidenti tashrifi. SHaxsan o'zim, Qirg'iziston terma jamoasi bunchalik agressiv va ochiq futbol namoyish etishini kutgamandim. Ikki terma jamoa o'rtasidagi farq ancha sezilarli bo'lgani uchun, mezbonlar ko'proq himoyada etibor qaratishi va qarshi hujumda Joel Kojo mahoratiga tayanishlari haqiqatga yaqinroqdek tuyulgandi.
Keling, Qirg'iz Respublikasi terma jamoasini biroz tahlil qilaylik. FIFA reytingida qo'shnilarimiz 102-o'rinda, O'zbekiston terma jamoasi esa ushbu reytingda 61-o'rinda, yani qirg'izlar reytingda bizdan 41 pog'ona pastroq. Qirg'iz Respublikasi terma jamoasining umumiy transfer qiymati esa 6 million 400 ming evro. Tarkibdagi eng qimmafutbolchisiis esa, Belarusning "Neman" klubi azosi Guljigit Aliqulov va uning transfer qiymati 700 ming evro deya baholangan. O'zbekiston terma jamoasining umumiy transfer qiymati 35 million evrodan sal ko'proq. Tarkibimizdagi eng qimmat futbolchi Abbosbek Fayzullaevning narxi esa 6 million evro, bu esa Qirg'iz Respublikasi terma jamoasining to'liq tarkib qiymati bilan deyarli teng. Statistika va raqamlar bo'yicha terma jamoamiz yaqqol ustun.
Statistikaga nazar tashlaydigan bo'lsak, Qirg'iz Respublikasi darvozamiz tomon bor-yo'g'i uchta aniq zarba bergan va ikkita gol urgan. Rustam Ashurmatov ham o'yindan keyin bu haqda aytib o'tgandi.
"Bugun raqiblar bor-yo'g'i ikkita vaziyatga ega bo'lishdi, ammo shu vaziyatlardan gol ura olishdi", - deya aytib o'tgandi Rustam Ashurmatov.
O'yindagi epizodlar
Uchrashuvning 8-daqiqasida Otabek SHukurov raqib darvozasiga yaxshi zarba yo'lladi, ammo raqib darvozaboni zarbani bartaraf eta oldi. 14-daqiqada esa, raqiblar hisobni ochishdi. Qanot himoyachisi Aleksandr Mishenko o'z qanoti bo'ylab uzun pas amalga oshirdi, Qayrat Jilgarbek-Uluu esa to'pga ega chiqdi va to'pni darvoza maydonchasiga yo'naltirdi. Alimardon SHukurov esa to'pni to'xtatmadi va dar xol Joel Kojoga pas berdi. "Dinamo" futbolchisi esa zarba berishda adashmadi va hisob 1:0. Mishenko pas bergan vaziyatda himoyachilarimiz kichik xatoga yo'l qo'yishdi va yakunda aynan shu xato sababli gol o'tkazib yubordik.
https://youtu.be/2usP7WuTvJU?si=pDgwK3rK7oYMIZy2&t=78
Rustam Ashurmatov va Umar Eshmurodovlar bir poziciyaga kelib qolishdi, natijada esa Kojo uchun ochiq zona paydo bo'ldi. Husniddin Aliqulov esa ikki nafar raqib futbolchisiga qarshi qolib ketdi va raqib futbolchilariga hech qanday qarshilik ko'rsata olmadi.
Jaloliddin Masharipov birinchi bo'limda o'z poziciyasini ikki marotaba o'zgartirdi. Masharipov avvaliga Oston Urunov qanotida bir muddat harakat qildi. Qisqa vaqt davomida Oston Urunov, Jaloliddin Masharipov va Hojiakbar Alijonov bir qanotda o'ynashdi. Keyin esa, Masharipov maydon markaziga o'tib oldi va asosan to'pni SHomurodov va Urunovga etkazib berish bilan shug'ullandi. Oddiy qilib aytganda, Masharipov yarim himoya va hujum o'rtasidagi "bog'lamchi" futbolchiga aynalib qoldi. O'ng qanot esa to'lig'i bilan SHerzod Nasrullaevga o'tdi va aynan o'ng qanotdan biz ikkinchi golni urdik. Futbolchilar o'z poziciyasini almashtirgani bo'yicha savolga Jaloliddin Masharipov shunday javob berdi:
"10-15 daqiqa vaqt ichida oldinda kamchilik bo'lib qolgan edik. Maydon markazi esa biroz bo'shab qolgandi, Nasrullaev esa qanotni to'liq egallay olishini bilardim. SHu sababli maydon markaziga o'tib, Eldor bilan Ostonga vaziyatlar yaratib berishga harakat qildim. SHundan so'ng vaziyatlarimiz soni ko'paydi. Endi yosh futbolchi emasmiz, ayrim bir vaziyatlarda masuliyatni o'z bo'ynimizga olib, vaziyatni o'zgartirishimiz kerak", - degandi Masharipov.
O'tkazib yuborilgan ikkinchi golda ham xatolik kuzatildi. Valeriy Kichin jarima zarbasidan to'pni darvoza tomon uzatdi, to'pga esa birinchi bo'lib Husniddin Aliqulov ega chiqdi va to'pni darvozamizdan uzoqlashtirish uchun boshi bilan zarba berdi. Himoyadagi tartibsizlikdan Odiljon Abdurahmonov foydalanib ketdi. Himoyachilarimiz uxlab qolishdi.
https://youtube.com/watch?v=2usP7WuTvJU&t=117&si=3rOSMYUaUDjjaDzj
Uch nafar futbolchimiz ham to'pga birinchi bo'lib egali qilolmadi. "Podbor"da xatoga yo'l qo'yildi va gol.
Terma jamoamiz namoyish etayotgan o'yinda kamchiliklar kuzatilishi tabiiy hol, ammo ushbu xatolar ustida ishlamasak, ochkolar yo'qotishimiz aniq. Joel Kojo yo'l qo'yilgan xatolardan foydalanib ketgan bo'lsa, Mehdi Taremi yoki Kayo bunday vaziyatlarni ko'rdim demaydi. Hozir natija bor, ammo o'yin sifati yaxshi emas. Buni qanday to'g'rilash esa bosh murabbiyning ishi. Ertaga Eronga qarshi uchrashuv. Eron hali o'z darvozasidan birorta to'p olib chiqmadi. O'zbekiston terma jamoasi Eron darvozasiga gol ura oladimi?
Mening fikrimcha, terma jamoamizning Qirg'izistonga qarshi uchrashuvdagi g'alabasi futbolchilarning individual mahorati evaziga qo'lga kiritildi. SHomurodovning realizaciyasi-yu, Urunovning driblingi va Aliqulovning bosh bilan yaxshi o'ynashiga jamoaviy o'yin va taktikaning hech qanday aloqasi yo'q.
Eron haqida
O'zbekiston milliy terma jamoasi Eronga qarshi uchrashuvni bosh murabbiy Srechko Katanecsiz o'tkazishi aniq bo'ldi. Srechko Katanec sog'lig'idagi muammolar tufayli uchinchi bor terma jamoa o'yinlarini o'tkazib yubormoqda. To'g'ri, bosh murabbiyimiz ertangi uchrashuvda taktika, tarkib va o'yin rejasini tuzib beradi, ammo milliy terma jamoa "boshsiz chavandoz" bo'lib yuraverishi ham yaxshi emas.
Eron terma jamoasi ham ikki uchrashuvda 6 ochkoni qo'lga kiritdi. Forslarning etakchi futbolchisi Alirizo Jahonbahsh ayni damda erkin agent va o'yin amaliyotisiz qolib ketgan. Bu biz uchun yaxshi, albatta. SHuningdek, G'alenoi jamoasida himoya chizig'i barqaror emas. Osiyo Kubogidan so'ng tajribali Romin Rizoyan terma jamoaga chaqirilmayapti, Hoseyin Kononi ham jarohat sabab oktyabr oyidagi uchrashuvlarni o'tkazib yuboradi. 35 yoshlik SHoja Holilzoda esa Osiyo Kubogi yarim finalidagi qizil kartochkasidan so'ng ko'pchilik tomonidan tanqid qilinmoqda. Holilzodani tezligi past ekanligi uchun ko'p tanqid qilishmoqda. Ikki nafar yosh himoyachi Hazbavi va Yusufilarga tajriba etishmayotgandek. Rizoyan terma jamoani tark etganidan so'ng uning o'rnini "Sepaxon" futbolchisi Saleh Hardani egalladi, ammo Hardani hali Rizoyan darajasidagi himoyachi emasligi yaqqol sezilmoqda.
Forslarning hujumdagi asosiy futbolchilari Mehdi Taremi va Sardor Azmunlarni ortiqcha etirof etishning hojati yo'q. O'zbekiston terma jamoasi uchun yana bir bosh og'riq bo'lishi mumkin bo'lgan futbolchi - Mehdi Gayedi. Mehdi asosan ikkinchi bo'limda maydonga tushirilmoqda. Qirg'iz Respublikasiga uchrashuvda Mehdi Torabining o'rniga, BAAga qarshi o'yinda esa Ali Golizodani almashtirgan futbolchi uchrashuvda kiritilgan yagona golga mualliflik qildi va uchrashuvning eng yaxshi futbolchisi sifatida etirof etildi. BAA chempionatida to'p tepadigan futbolchisi joriy mavsum milliy chempionatda 4ta uchrashuvda ishtirok etib, 3ta gol va 1ta assistga mualliflik qildi. Gayedi o'z jamoasining 57% golida ishtirok etgan. Asosan chap qanot vingeri poziciyasida o'ynaydigan futbolchi ertangi bahsda terma jamoamiz himoyachilari uchun bosh og'riq bo'lishi aniq.
Yaqindagina Gayedi terma jamoadagi 10-raqamga loyiq ko'rildi. Bunga qadar, Ali Dai, Ali Karimi, Ali Parvin, Mehdi Mahdavakiya va Sardor Azmun kabi afsonaviy futbolchilar ushbu raqam ostida harakat qilishgandi.
Bosh sahifaga
132
