Rifat Akramxo'jaev: "Birinchi goldan keyin ustunlik biz tarafga o'tdi"

- O'yin haqida
- Avvalambor, butun O'zbekiston ahlini Navro'z ayyomi bilan tabriklayman. O'yinga keladigan bo'lsak, oson o'yin bo'lmadi, yigitlarga rahmat aytaman. Bahona qilmoqchi emasmiz, lekin oxirgi kunlarda ko'p yo'l bosib o'tganimiz tufayli bizda charchoq alomatlari sezildi. Gol o'tkazib yuborganimizdan keyin o'yin surati o'zgarib, ustunlik biz tarafga o'tdi. Ozgina omadimiz kelganida, yutib ketishimiz ham mumkin edi. Yomg'irli ob-havoda stadionga kelib, bizni qo'llab-quvvatlab turgan muxlislarga tashakkur deyman. O'ylaymanki, keyingi o'yinlarda bundan ham chiroyli o'yin ko'rsatishga intilamiz.

- Boshlang'ich tarkibda deyarli 2 hujumchi xizmatidan foydalandingiz. Uchrashuvning taxminan 30-daqiqalariga borib, taktik o'zgarishni amalga oshirdingiz. Bu nimani anglatadi?
- Poziciyalarni o'zgartirganimizning sababi – o'rtada bog'lovchi o'yinchi topilmadi. SHu bois Jasurni o'ngga, Islomni o'rtaga qo'ydik.

- 0:1 hisobida mag'lubiyatga uchrab turganimizga qaramasdan, yosh hujumchi Muhammadali Abdurahmonovni maydonga tushirdingiz. Bu bo'yicha nima deya olasiz?
- Sababi yutqazayotgandik, 4-3-3 sxemasiga o'tdik. Yosh hujumchimiz ishonchni oqlayapti, U U21 jamoasida ham yaxshi o'yin ko'rsatyapti,. Bugun ham "Qo'qon-1912" himoyachilarini ancha qiynadi.

- Eldor Boymatov qachon safga qaytadi?
- U umumiy guruh mashg'ulotlariga qaytgan. Xudo xohlasa "So'g'diyona" bilan o'yinga tayyor bo'ladi. Nuriddin Hasanov bilan bog'liq holat esa hali so'roq ostida.

- Jamoa hujumdagi yakuniy pallalarda nega qiyinchilikka duch kelyapti?
- Bilasizmi, har bir jamoa murabbiyiga ozgina vat kerak. 1 hafta, 10 kun yoki 1 oy emas. 2 oydan sal oshgan vaqt davomida yigitlar shunchalik bir-biri bilan kelishib o'ynashyapti. Eng keraklisi, yigitlarda ishtiyoq bor, lekin hayajon sezilyapti. Oxirgi nuqtada sal o'xshamay qolyapti. O'ylaymanki, keyingi o'yinlarda imkoniyatlardan foydalana boshlashadi.