To'g'risi aytsam, o'zim ham bilmas ekanman. Rostan, yaqingacha Erkin Baxtiyorov O'FA Hakamlar markazi direktori edi. Negadir to'satdan "g'oyib" bo'lib qoldi. Bilganim shuki, hozir ushbu markazni Laziz Qo'chqorov boshqaryapti. Keyin o'zim ham qiziqib Erkin Baxtiyorovni surishtirishni boshladim va ko'p o'tmay topdim. Erkin aka hozirgi paytda "Lokomotiv" futbol klubida faoliyat yuritib kelayotgan ekan.
Erkin Baxtiyorovga qo'ng'iroq qilib intervyu olish istagim borligini bildirganimda hozir emas, keyinroq va agar xohlasangiz o'zingiz maqola yozishingiz mumkin dedi. SHundan so'ng erkin ijod sifatida Erkin Baxtiyorov haqida bilganlarimni qoraladim.
1993 yil Toshkent shahrida tug'ilgan Erkin Baxtiyorov 2023 yilning may oyidan "Lokomotiv" professional futbol klubida Xalqaro munosabatlar va licenziyalash menejeri sifatida ishlab kelmoqda. U katta futboldagi ilk qadamini 2009 yil "Paxtakor" klubi matbuot xizmatida qo'ygan bo'lib, o'shanda taniqli sharhlovchi Mirzahakim To'xtamirzaev qo'l ostida faoliyat yuritgandi. O'sha yillari ustoz jurnalist Mirzahakim To'xtamirzaev "Paxtakor" futbol klubi matbuot xizmati rahbari sifatida ish olib borardilar.
2009-2011 yillar oralig'ida "Paxtakor"da ishlagan Erkin Baxtiyorov keyinchalik Toshkent Moliya instituti talabasiga aylanib, 2016 yilgacha tahsil oldi va o'qishni tugatgach "Angren shakar" MCHJda kichik iqtisodchi bo'lib ish boshladi. SHu bilan birga o'qishni ham davom ettirib, ikkinchi mutaxassislik sifatida O'zbekiston Milliy universitetining jurnalistika fakulteti sirtqi bo'limida tahsil oldi.
Futbolga bir qiziqdingizmi, baribir sohadan chiqib ketish oson bo'lmaydi. Futbol doim o'z og'ushiga tortib turadi. SHuning uchun bo'lsa kerak, Erkin Baxtiyorov ham yana futbolga qaytib, dastlab O'FA marketing bo'limi etakchi mutaxassisi sifatida ishga kirishdi. Keyinchalik faoliyatini O'zPFLda davom ettirgan Erkin aka dastlab sport bo'limida etakchi mutaxassis, so'ngra klublarni licenziyalash bo'limida bosh mutaxassis sifatida faoliyat olib bordi.
Yosh kadrning izlanuvchanligi hamda o'z kasbiga bo'lgan sadoqati sabab faqat O'zPFL bilan cheklanib qolmadi. 2020 yilning noyabr oyida 27 yoshli Erkin Baxtiyorovga O'FA Hakamlar bo'limi boshlig'i vazifasi ishonib topshirildi. Va ikki yilga yaqin vaqt mobaynida shu lavozimda ish olib bordi. Bundan tashqari Osiyo chempionlar Ligasining bir nechta o'yinlarida mahalliy koordinator, Superkubok va Superliga uchrashuvlarida komissar bo'lib ishlashi tajriba yanayam ortishiga xizmat qildi.
Esingizda bo'lsa, 2020 yil bo'lib o'tgan O'zbekiston Kubogi final uchrashuvida ilk bor VAR tizimi amalda tadbiq etib ko'rilgandi. Namangan shahrida bo'lib o'tgan "Paxtakor" - OKMK bahsida VAR qo'llanilishi katta voqeaga aylangandi. 2021 yilgi mavsumdan Superliga bahslarida ushbu texnologiyani qo'llash odat tusiga kirganini yaxshi bilasiz.
Bizga malum bo'lishicha, VAR texnologiyasini O'zbekistonga olib kelishda Erkin Baxtiyorov ham katta hissa qo'shgan. Buning uchun avvalo FIFA roziligini olish kerak bo'ladi va bu oson bo'lmagan. O'shanda O'FA birinchi vice-prezidenti Ravshan Ermatov VAR orqali ko'p muammolar joyida hal bo'ladi degani hamon yodimizda.
2022 yilning may oyida Erkin Baxtiyorov O'FA Hakamlar markazi rahbarligidan ketdi va ancha payt futbolda ko'rinmay qoldi. Faqat oradan bir yil o'tib uning "Lokomotiv"dagi faoliyati orqali yana futbol jamoatchiligiga qaytganini eshitdik.
Abdulvosit Bektemirov.
Bosh sahifaga
101
