- G'alaba keltirgan gol qanday amalga oshganini aytib bersangiz?
- Bu juda tez sodir bo'ldi. Menga bunday vaziyatlar yoqadi, chunki mashg'ulotlarda ham shunday gollar urgan paytlarim bo'lgan. Lekin o'yin umuman boshqa narsa. SHu lahzalarda yoshligimizda qatnashgan turnirlarni esladim. U erda ham xuddi shunday tarzda to'p kiritganman. "Lokomotiv" bilan o'yindan so'ng bobom bilan gaplashdim. U ham menga yuqoridagi holatni eslatdi. Bu his-tuyg'uni so'z bilan ifodalab bo'lmaydi.
- Golgacha bo'lgan vaqtda "Nasaf" "Lokomotiv" darvozasi oldini faol qurshab oldi. Bozorovning to'p uzatishidan so'ng...
- Ha, goldan oldin ko'p hujum qildik. Bir payt qarasam Oybek menga qarata to'p uzatyapti. Bu vaqtda kimdir hujum vaqtida zarba berishi kerak degan fikr paydo bo'ldi. To'pni olishga va tavakkal qilishga harakat qildim. Bularning barchasi juda tez kechdi. O'yindan keyin takroriy vaziyatni ko'rib zarba beradigan odam yo'qligini ko'rdim (kuladi).
- O'yinga qanday tayyorgarlik ko'rdingiz? Bosim bo'lmadimi?
- Ijobiy kayfiyatda tayyorgarlik ko'rdik. O'yin oson bo'lmasligi aniq, raqibga ham ochko kerak edi. Bosim bor edi, lekin biz professionalmiz. Bu bosimni muvaffaqiyatli engib o'tdik. Hamma narsani to'g'ri qila oldik.
- O'zingizdan qanday hissiyotlar o'tyapti?
- Bu hissiyotlarning cho'qqisi. Biz uzoq kutilgan chempionlikni qo'lga kiritdik. U endi tarixda qoladi. CHempion bo'lishimizga ishonmaganlarga: biz buni uddaladik va qolgani muhim emas. Biz tirishqoqlik bilan maqsadimiz sari qadam tashladik.
- Klub muxlislariga nima demoqchisiz?
- Barcha muxlislardan minnatdorman. Ularning olqishini har doim his qilamiz. Bu chempionlikni muxlislar ham, qashqadaryoliklar ham anchadan beri kutayotgandi. Endi g'urur bilan barchani tabriklashimiz mumkin. Bu bizning umumiy muvaffaqiyatimiz va g'alabamizdir.
Emil Bekmuxammedov suhbatlashdi
Bosh sahifaga
1952