26-turning principial to'qnashuvlaridan biri Vodiy derbisi bo'ladi. Unda "Navbahor" jamoasi "Andijon"ni mehmon qiladi. Mana shu o'yindan oldin "lochinlar"ning 32 yoshli sardori Azimjon Ahmedov klub matbuot xizmatiga ayrim fikrlarini bildirib o'tdi.
"Jamoamiz joriy mavsumning oxirgi bahsini "Andijon"ga qarshi o'tkazadi. Mazkur klublar turnir jadvalida qaysi o'rinda bo'lishidan qatiy nazar, "vodiy derbisi" o'yinlari doimo shiddatli va keskin kurashlar ostida kechgan. Bu safargi bahs ham bundan mustasno bo'lmaydi, albatta.
Bundan tashqari, jamoamizda sovrindorlar safidan joy olish imkoniyati saqlanib qolgan, shuningdek, bo'lajak raqibimiz "Andijon" bilan Superliga va O'zbekiston kubogi finalidagi alamli mag'lubiyatlar uchun o'zgacha hisob-kitobimiz bor.
SHuning uchun bo'lajak o'yinda maydonga o'zgacha ruh va ishtiyoqda tushib, g'alaba qozonib, muxlislarga quvonch ulashish, joriy mavsumning so'nggi bahsini ijobiy tarzda yakunlashga harakat qilamiz. Buni amalga oshirish uchun barcha imkoniyatimizni ishga solamiz. Ishqibozlardan esa jamoamizni bevosita stadionda munosib tarzda qo'llab-quvvatlab, g'alabamizga madadkor bo'lishlarini so'rab qolaman.
Fursatdan foydalanib, joriy mavsumda jamoamizga barcha sharoitlarni yaratib bergan Namangan viloyati hokimi SHavkatjon SHokirjanovich Abdurazzoqov va "Navbahor" klubi vice-prezidenti Otabek Arifovich Samatovlarga futbolchilar nomidan o'z minnatdorchiligimni bildiraman," - dedi Azim Ahmedov.
Eslatib o'tamiz, so'nggi tur oldidan "Navbahor" jamoasi 42 ochko bilan 4-o'rinda bormoqda. "Lochinlar"da hali uchinchi va hattoki ikkinchi o'rinni egallash uchun ham nazariy tomonlama imkoniyat saqlanib qolgan. "Andijon" esa 29 ochko bilan jadvalning 8-pog'onasidan joy olgan. "Burgutlar" g'alaba qozongan taqdirda ham bu o'rindan yuqoriga chiqa olishmaydi. Ammo, yutqazib qo'yishsa biroz pastga tushishlari mumkin.
Bosh sahifaga
180