"O'yinga to'xtalishdan oldin biz oldimizga qo'yilgan vazifani bajarishni uddasidan chiqa olganimizni aytmoqchiman. Birinchi o'rinda hammaga va yaratganga rahmat aytmoqchiman. Ikkinchidan maydon ortida faoliyat olib borgan, ko'zga ko'rinmagan barcha shaxslarga, massajist, oshpaz, xaydovchi, maydon parvarishlovchilarga minnatdorchiligimni bildirib o'tishni joiz deb bilaman. Biz g'alabani ularga bag'ishlaymiz. Albatta, o'z o'rnida Italiyadan kelgan va meni yonimda turgan oilam, murabbiylar shtabimni olqishlayman. Bizni yolg'iz qoldirmagan rahbariyat, borini bergan futbolchilarimga ham tashakkurimni izhor qilaman. Ikkinchi davrada ular mo'jiza ko'rsata olishdi. Futbolchilar o'z ishini yuz foizga bajardi",- deydi Ilyos Zeytullaev.
- "Bunyodkor" ikkinchi davrada o'yin tomonlama ham, natija jihatdan ham ijobiy tomonga o'zgardi. Bu esa o'yinlarda yaqqol sezildi. Jamoa har bir o'yinda vaziyat yaratdi. Lekin foydalanishga kelganda oqsadi. Aynan oldingi chiziq vakillari o'z ishlarini qanchalik bajarishdi? Bugungi o'yindachi?
- Ulardan ko'nglim to'ldi. Bugungi raqib "Paxtakor" edi. Raqib tarkibida yoshlar ko'p edi, lekin jamoa sifatida yaxshi shakllangandi. Himoyada agressiv o'ynadik. Ular xato qilishini kutmadik va o'zimiz xato qilishga majbur qildik. "Olimpik" bilan ham shunday o'ynagandik. "Paxtakor" futbol o'ynaydi va raqibga ham o'ynashga imkon beradi. Bu yaxshi albatta. Umuman olganda jamoa oldiga qo'yilgan vazifani muvaffaqiyatli bajardi deya olaman. Bunday jamoa bilan ishlaganimdan faxrlanaman.
- Jamoa o'yin tomonlama o'zining plankasiga chiqdi. Endi buni davom ettirish kerak bo'ladi. Keyingi yilgi rejalaringiz qanday?
- Men o'z vazifamni bajardim. Bu savol rahbariyatga berganingiz maqul. Avval aytganimdek, biz bitta kemada edik. Kemani portga etkazib qo'yish talab etilgandi. Hamma xursand. Klub rahbariyatiga Islom Inomov va Murod Alievga minnatdorchiligimni bildiraman. Islom Inomov qiyin pallada jamoani topshirishdan qo'rqmadi va ishondi. O'z shtabim bilan qiyin vazifani uddaladik. Men hozir Italiyaga yo'l olaman va hordiq chiqaraman.
- Bugungi kunda saviyali legioner topish mushkul ish. Bu xuddi lotoreyaga o'xshagan narsa. Andriya Filipovichshni lotoreyaga qiyoslash mumkinmi?
- Andriya juda kuchli futboli va bunga barcha guvoh bo'ldi, shubha qoldirmadi. U jamoaga ko'p yordam berdi. Ko'p bor gaplashdik, tushuntirdik. Bunday o'yinlardagi harakatlari uning darajasidan darak beradi. Andriyani Doriev, Yovovich darajasidagi futbolchi deb o'ylayman. Legionerlardan tashqari jamoadagi barcha futbolchilarning mehnatini yuqori baholayman.
Bosh sahifaga
176