"Bu maqsadlari yuqori "Andijon", legionerga aylanishdan muxlislar to'la stadionda o'ynashni istadim" - "Burgutlar"ning yangi qalqoni yana nimalar dedi?

Kecha klub o'zining limitdan tashqari dastlabki transferlarini elon qildi. Darvoza chizig'idagi raqobatni mustahkamlash uchun OKMK kiperi Valijon Rahimov taklif etildi. Biz esa uning yangi jamoasi haqidagi fikrlari bilan qiziqdik.

- 5 yillik faoliyatingizdan so'ng Olmaliqni tark etdingiz. OKMK yangi darajaga chiqishingizga turtki bo'ldimi? 

- Allohga shukurki, Olmaliqda o'tkazgan 5 yilim juda zavqli va esda qolarli onlarga boy bo'ldi. Ajoyib hissiyotlarni so'z bilan tariflab bera olmayman. Superligada, OCHLda debyut qildim. Terma jamoadan chaqiruv oldim.  SHu vaqt mobaynida qo'llab-quvvatlagan muxlislar, murabbiylar, rahbariyat va jamoadoshlarimga katta rahmat aytaman. Kelgusida ularga ulkan zafarlar tilab qolaman. 

- O'tgan mavsumda o'yin amaliyoti etarlicha bo'lmadi. OKMKdan ketish uchun asosiy sabab edimi yoki shunchaki muhitni o'zgartirishmi? 

- To'g'ri, oxirgi mavsumda o'yin amaliyoti kam bo'ldi deya olaman. Futbolchi uchun bu narsa muhim ahamiyat kasb etadi. Jamoamni va muhitni almashtirish vaqti kelib qolgandi. Ketish haqida o'ylash va bir qarorga kelish oson bo'lgani yo'q. Lekin bu - futbol. Barcha bilan do'stona xayrlashish yoqimli hislarni taqdim qildi. Hammadan minnatdorman.

- "Andijon"ning OCHLda o'ynashi tanlovning asosiy faktoriga aylandimi?

- So'nggi yillarda "Andijon"ning maqsadlari yuqoriladi. Sezilarli darajada o'zgarishlar yuz bermoqda. Rahbariyat bilan gaplashdik, murabbiylar fikrini so'radim. Bu yangi jamoaga o'tishimda o'z tasirini o'tkazmay qolmadi. Menda boshqa jamoalardan takliflar, qolaversa legionerga aylanish imkoniyati paydo bo'lgandi. Ammo "Andijon"dagi atmosfera, muxlislar to'la stadionda o'ynashni ko'proq istadim. OCHLdagi qiziqarli uchrashuvlar ham o'zgacha motivaciya berishi shubhasiz.

- "Andijon" haqida bilasiz, ko'p bor to'qnash kelgansiz. Bugungi jamoaga qanday tarif berasiz?

- Hozirgi "Andijon" ancha shakllanishga ulgurdi. Keyingi mavsumga jamoa o'zagini saqlab qolgan holda tarkib yana kuchaytirilishi kutilmoqda. Yangi mavsumda maqsadlar yuqori bo'ladi. Bu yo'lda barchamiz birlashib harakat qilamiz.