Ikrom Aliboev va "Seul" klubi o'zaro hamkorlikni to'xtatdi

Hamyurtimiz 2019 yil boshida Janubiy Koreyaning "Seul" klubiga ko'chib o'tgan va 3 yillik shartnomaga imzo chekkandi.  Kecha "Seul" klubi instagramdagi rasmiy sahifasi Ikrom Aliboev bilan xayrlashuv postini joyladi:  

"Aliboev bilan shartnomani bekor qilish haqida

"Seul" klubi azosi Ikrom Aliboev ikki tomonlama kelishuv asosida shartnomani bekor qildi. "Seul" klubi Aliboevning o'yinlari, natijalari uchun minnatdorchilik bildiradi. Uning keyingi faoliyatida omad tilaymiz".


Bu borada Ikrom Aliboev bilan bog'landik va uning fikrlari bilan qiziqdik.

"Klub bilan kelishuvni bekor qilishimning eng katta sababi jarohatim. Aynan shu jarohat tufayli 7 oyni futbolsiz o'tkazdim. Bu men uchun yomon, sababi futbolchining faoliyati qisqa davom etadi. Imkon boricha ko'proq o'yin o'tkazishim kerak. SHu bois klubdan ketishga qaror qildim. Aslida shu yil oxirigacha shartnomam bor edi va klubda qolib maydonga tushmay shunchaki maosh olib yursam ham bo'lardi. Lekin bunday qilolmasdim va klub bilan kelishgan holda shartnomani bekor qildik.

Hozircha qaysi jamoada o'ynashim aniq emas. K Liga klublaridan biriga o'tish niyatidaman. Aslida K1 yoki K2 liga klubi bo'ladimi buning katta farqi yo'q. Agar shartnoma tuza olmasam yana yarim yil futbolsiz qolaman. SHu sababli jarohatimdan tiklanib yana avvalgi formaga qaytishim uchun harakat qilishim zarur", - deydi Ikrom Aliboev championat.asia saytiga.