O'zbek futboli uchun esa bir qancha yodda qolarli, zavqli onlarga boy mavsum bo'ldi deyishga asoslarimiz etarli. Quyida birma bir eslaymiz.
Tarixiy Olimpiada eshiklari ochildi
O'zbekiston olimpiya terma jamoasi 1996 yildan buyon to shu kungacha har to'rt yillikning nufuzli musobaqasi Olimpiadada ishtirok etish uchun bir necha bor urinib ko'rgan. Lekin bu nasib qilmagandi. 2024 yilda Timur Kapadze boshchiligidagi olimpiya terma jamoamiz Qatardagi U-23 Osiyo kubogida finalgacha etib bordi va Parijdagi olimpiadaga yo'llanmani qo'lga kiritdi. Buning uchun ular uzoq yo'lni birgalikda bosib o'tdi. Mazkur yo'lni boshida Ahmadjon Musaev, Dilshod Nuraliev, Otabek G'ulomxo'jaev, Timur Kapadze kabi murabbiylar, futbolchilarni etishtirib bergan mutaxassislar o'z hissalarini qo'shishdi.
Futzal bo'yicha Jahon chempionati O'zbekistonda o'tkazildi
So'nggi yillarda OFK musobaqalarini o'zida qabul qilayotgan O'zbekiston endilikda FIFAning futzal bo'yicha Jahon chempionatiga mezbonlik vazifasini o'tadi. Mazkur mundial yurtimizning Toshkent, Buxoro, Andijon shaharlariga ishonib topshirildi. Garchi Xose Venansio Lopes boshchiligidagi terma jamoamiz muvaffaqiyatsiz qatnashgan bo'lsada, muxlislar Braziliya, Qozog'iston, Argentina kabi jamoalarning ajoyib o'yinlaridan bahramand bo'lishdi. Finalda Braziliya Argentina ustidan 2:1 hisobidagi g'alabaga erishdi va futzalda tengsizligini isbotladi.
"Nasaf" nihoyat O'zbekiston chempioni
Qarshining "Nasaf" jamoasi bu yil o'z tarixida ilk bor chempionlikni rasmiylashtirdi. "Ajdarlar" bunga qadar Superligada kumush, bronza medallariga ega chiqqan, O'zbekiston kubogi, Superkubogida, OFK kubogini boshi uzra baland ko'targandi. Sovrinlarning cho'qqisiga esa chempionlik etishmayotgandi. SHu bilan birga Ro'ziqul Berdiev shogirdlari Toshkent klublarining gegemonligiga barham berishdi. Mutaxassis esa faoliyatidagi eng yaxshi mavsumni o'tkazdi desak mubolag'a bo'lmaydi. CHempionlik uchun OCHL va kubok qurbon qilindi. Ahir bir narsaga erishish uchun bir narsadan voz kechish kerak! Aytgancha, bu mavsumda Superliga ("Nasaf"), Pro liga ("Mashal"), Birinchi ligada ("Nasaf-Farm") Qashqadaryo jamoalari g'oliblik shoxsupasiga ko'tarildi.
"Andijon" O'zbekiston kubogi g'olibi
O'zbekiston kubogi bahslari joriy yilda shiddatli, murosasiz, kutilmagan natijalarga boy o'tgani bilan yodda qoldi. Xususan, vodiyning ikki jamoasi "Andijon" va "Navbahor" kuchli jamoalarni ortda qoldirgan holda O'zbekiston kubogi finaligacha etib keldi. Farg'onadagi "Istiqlol" stadionida dramatik kechgan finalda "burgutlar" o'z tarixida birinchi marotaba ushbu turnirda g'olib sifatida maydonni tark etdi. "Burgutlar" 2025 yilda OCHL-2 musobaqasida ishtirok etadi.
Jahonni o'ziga qaratgan Abduqodir Husanov
Bu yil O'zbekiston terma jamoasi futbolchilari orasida eng katta o'sish Abduqodir Husanovda bo'ldi deb baralla ayta olamiz. Top-5 chempionatlaridan biri hisoblangan Franciyaning "Lans" klubida yo'qolib qolmagan vakilimiz tezda o'zini ko'rsatishga kirishdi. U nafaqat jamoasining asosiy futbolchisi, balki muxlislarning ham yoqimtoy o'yinchisiga aylanib ulgurdi. Endilikda esa uni qo'lga kiritish istagidagi jamoalar kundan-kunga ko'paymoqda. Jumladan, o'yinchini "Nyukasl Yunayted", "Lester Siti", "Manchester Siti", "Tottenxem", shuningdek Germaniyaning "Red Bull Leypcig" klubi kuzatmoqda. Biz esa unga omad tilaymiz.
Abbosbek Fayzullaev Osiyoning eng yaxshi yosh futbolchisi
So'nggi yillarda OFK tomonidan aniqlanayotgan yilning eng yaxshilarini nominaciyalarida O'zbekiston nomi ko'p tilga olinmoqda. Xususan, 2024 yilda qitaning eng yaxshi yosh futbolchisi nomiga CSKA klubi va O'zbekiston terma jamoasi futbolchisi Abbosbek Fayzullaev loyiq ko'rildi. So'nggi bor 2015 yilda Dostonbek Hamdamov Osiyoning eng yaxshi yosh futbolchisi sifatida qayd etilgan edi. "Armiyachilar" safida har bir o'yinda faol harakat qilayotgan, terma jamoa tarkibida muhim golni urgan Fayzullaev haqiqatdan ham bu sovringa munosib edi.
Ilgiz Tantashev Olimpiadada ishladi
2012 yil men oddiy muxlis sifatida Ravshan Ermatovning London-2012 Olimpiadasida ishtirok etganiga guvoh bo'lganman. Bundan keyin ham qachondir yana o'zbekistonlik referi shunday katta musobaqada ishlarmikan degan hayol o'tgan. Oradan 12 yil o'tib yana hamyurtlarimizdan biri Ilgiz Tantashev Olimpiadadan chaqiruv oldi. O'zbekistonlik hakam musobaqada Franciya - Gvineya, Paragvay - Mali, Franciya - Argentina, Marokash - Ispaniya uchrashuvlarini boshqardi.
"Metallurg" endi Superligada yo'q
Bekobodning "Metallurg" jamoasi garchi sport principlariga ko'ra va o'z kuchi bilan Superligada qolish vazifasini bajarganiga qaramay rahbariyat jamoani elitada ishtirok etmasligini bildirdi. Jamoa yil davomida oxirgi o'rinlarda yurganiga qaramay so'nggi pallada iroda ko'rsatgan holda o'rnini saqlab qolgandi. Ammo har doim ham inson istagan narsa bo'lavermaydi. Asosiy jamoaning ketidan akademiya ham tugatilishi haqida xabar chiqqandi. Ammo bu malumot inkor qilindi. "Metallurg" 1998 yildan buyon muntazam Superligada ishtirok etib kelayotgan edi.
Hakamlar yo'qolib qoldi
Mavsum o'rtasidan so'ng nima uchundir bir nechta taniqli hakamlar, nomdor referilar yo'qolib qoldi. O'zFHM esa Aziz Asimov hakamlik faoliyatini yakunlaganini elon qildi. Lekin qolganlar bo'yicha biron malumot yo'q. Deylik, Rahimbek Karimov, Firdavs Norsafarov, Akobirxo'ja SHukurullaev va hokazo. Ularning ayrimlari xalqaro maydonda faoliyatini davom ettirdi. O'yinlarga tayinlovlar oldi.
O'zbekiston futzal federaciyasi tashkil etildi
Aslida bunday tashkilot bizda avvaldan bo'lib kelgan. Lekin so'nggi yillarda futzal O'FA tarkibiga kiritildi. Endilikda ushbu sport turi mustaqil tashkilot sifatida faoliyat yuritadi. Unga Bekzod Mamatqulov rahbarlik qiladi. Yaqinda tashkil qilingan anjuman, konferenciyada bu haqida batafsil malumot berildi.
Yangi yilingiz bilan!
Bosh sahifaga
628