2018 yil qisqa vaqt jamoada to'p tepgan Farhod Bekmurotov "temiro'ylchilar" safiga qaytdi. "Andijon" bilan shartnomasi yakunlangan yarim himoyachi faoliyatini poytaxt bilan bog'laydi. Biz Bekmurotov bilan bog'lanib fikrlarini tingladik.
- OCHLda ishtirok etadigan "Andijon"ni Pro ligaga tushib ketgan "Lokomotiv"ga almashtirish qanday bo'ldi?
- To'g'ri aytdingiz. "Andijon" bilan OCHLda o'ynashni juda istagan edim, chunki avvaldan xalqaro maydonda o'ynaydigan klublarimizga havas ko'zi bilan qaraganman. Lekin nasib qilmasa qiyin ekan. "Lokomotiv" esa qiziqarli taklif bilan chiqdi. Yakunda ularning chorloviga rozilik berdim. Bor gap shu.
- SHartnomangiz yakunlangandi va bundan kelib chiqyaptiki "Andijon" tomoni sizni o'zida olib qolishni istamagan?
- Klubdan hech qanday taklif bo'lgani yo'q. SHuning uchun boshqa variantlarni ko'rib chiqishga to'g'ri keldi. Yuqorida aytganimdek "Lokomotiv" tanlovi har tomonlama maqul keldi.
- "Temiryo'lchilar" libosini kiyish siz uchun begona holat hisoblanmaydi. Avvalgisida yosh va tajribasiz bo'lgansiz...
- 2018 yil bir davra o'ynaganman. U vaqtda tarkib juda kuchli, chempionlikni hech kimga bermayotgan paytlar. Bekorga ketma-ket 3 yil birinchi o'rinda yurmagan. "Andijon" bilan Pro ligada uchinchi o'rinni olganimizdan so'ng Andrey Fyodorov kuchli klubda o'zimni sinab ko'rishimni aytgan. Raqobat kuchli edi. O'sha mavsum baribir ikkinchi davrada "Andijon"ga qaytib Pro liga chempioni bo'lganman.
- 2024 yil faoliyatingizda yangi sahifa ochdimi?
- SHubhasiz eng zo'r mavsumimni o'tkazdim. Kubokda tasodifan g'olib chiqib qolganimiz yo'q. Guruh bosqichida yaxshi jamoalarni chiqarib yubordik. Xudoning qudrati va o'zimizning mehnatimiz evaziga erishdik. Guruhdan keyin faqat kubokka ega chiqishni o'ylaganmiz. Yutqazib qo'ysakchi degan fikr o'tgani ham yo'q. SHunchalik ishonchimiz kuchli edi. Niyatimiz xolis ekan. Endi "Andijon" yaratgan tarixni hech kim o'chira olmaydi.
- "Lokomotiv" bilan yangi mavsumga tayyorgarlik haqida...
- O'zimiz qatnashadigan barcha musobaqalarda chempionlikni maqsad qilganmiz. "Lokomotiv"ni o'z o'rniga qaytarishimiz kerak. Bu jamoaning o'rni Superligada. Fursatdan foydalanib butun "Andijon" xalqiga, Nodir aka To'ychiev etakchiligidagi muxlislarga, klubimiz, viloyatimiz rahbarlariga minnatdorchilik bildirmoqchiman. OCHLda omad yor bo'lsin.
Bosh sahifaga
70
