Sport principlari bo'yicha ayni paytda "Xorazm" bu borada harakatlarni boshlab yuborgan. Toshkentda yig'in o'tkazayotgan "Xorazm" bugun "Dinamo"ga qarshi nazorat uchrashuvida maydonga tushdi. Uchrashuvdan so'ng jamoa ustozi Hakim Fuzaylovning fikrlari bilan qiziqdik.
- Qishki yig'indagi birinchi nazorat uchrashuvidan qanday xulosalar olindi?
- Bu tarkibda maydonga tushganlarning katta qismi yoshlar, xorazmlik yigitlar hisoblanadi. Ularni ko'rib oldik. Bu o'yinda turlicha tarkibni sinovdan o'tkazdik degan bo'lardim.
- Hakim Qayumovich yangi mavsumga tayyorgarlik qanday ketmoqda?
- Reja asosida yig'inlarni davom ettirmoqdamiz. Tarkibga imkon qadar Superligada o'ynagan, tajribali futbolchilarni jalb qilish ustida ish olib bormoqdamiz. Umuman olganda barchasi yaxshi ketyapti. Endi mavsumni qaerda boshlashimiz to'liq aniq bo'lsa shunga qarab yana harakatlarimizga o'zgarishlar kiritishimiz mumkin.
- Birinchi yig'in Xorazmda o'tkazildi va unda ko'p mahalliy futbolchilar ko'rikdan o'tdi. Bu yana davom etayotganini ko'rishimiz mumkin...
- Dekabr oyida tashkil qilgan yig'inimizda ko'plab yoshlar jamoamizda shug'ullandi. Yuqorida aytganimdek Superligada ishtirok etadigan bo'lsak tabiiyki tarkibimizni kuchaytirish kerak bo'ladi.
- Jamoaning Superligada ishtirok etishi bo'yicha harakatlar qanday ketyapti?
- Xorazmlik muxlislar Superligani sog'inishgan. Elitada qatnashadigan bo'lsak ishqibozlarimizga katta bayram bo'lardi. "Xorazm" avval ham Superligada o'ynagan va o'shanda stadionga ko'plab muxlislar tashrif buyurgan. Klubimiz rahbarlari barcha harakatlarni amalga oshirmoqda. Tarkib, maydon, infratuzilma borasida ishlar olib borilayotganini aytishim mumkin.
- Xorijda yig'in o'tkazish uchun qaysi mamlakat tanlanmoqda?
- Bu ustida ishlayapmiz. Moliyaviy imkoniyatlarimizdan kelib chiqib Turkiya yig'inini mo'ljallab turibmiz. Faqat undan avval Toshkentda yana bitta yig'in o'tkazamiz. Tarkibni 90 foizga aniqlashtirib olgan holda xorijga yo'l olishimiz mumkin.
Bosh sahifaga
67
