Xo'sh, bungacha "shaharliklar" tarkibida aynan qaysi futbolchilar bu raqamda maydonga tushgan?
Stiven Elliott (Irlandiya)
2003/04 yilgi mavsum "shaharliklar" sharafini himoya qilish bilan futboldagi katta yo'lini boshlagan Stiven deyarli hech vaqt qaydnomadan joy olmagan. SHu bois u bor-yo'g'i 2 ta o'yinda umumiy 16 daqiqa maydonda harakat qilgan xolos. Biroq fakt shuki, hujumkor yarim himoyachi 45-raqamda to'p tepgani bilan "Manchester Siti" tarixida qolgan.
Mayka Richards (Angliya)
2005 yil 22 oktyabr kuni "Arsenal"ga qarshi o'yinda 17 yoshli Mayka Richards zaxiradan maydonga tushib, "shaharliklar" birinchi jamoasida debyut qilgan. Dastlabki – 2005/06 yilgi mavsumida Mayka 45-raqam ostida to'p tepgan va 16 o'yinda maydonga tushib, hisobiga 1 ta gol yozib qo'ygan. Keyingi mavsum David Sommey jamoadan ketgach, 2-raqamni o'ziniki qilgan.
Mario Balotelli (Italiya)
2010 yildan 2013 yilgacha "shaharliklar" tarkibida harakat qilgan hujumchi bu raqamni mashhur qilgan futbolchi deb bemalol aytish mumkin. Har qanday qidiruv tizimiga "45-raqamli futbolchi" deb yozsangiz, sizga avval "Super Mario"ni, keyin boshqalarni chiqarib beradi. Mario 3 yil mobaynida 80 uchrashuvda qatnashib, 30 ta to'p kiritgan hamda 6 ta golli pas uzatgan. Forvard jamoa bilan bir bor chempionlikni tantana qilgan bo'lsa, Angliya Kubogi va Angliya Superkubogini qo'lga kiritishga ham ulgurgan.
Demeako Dyuxani (Angliya)
2017/18 yilgi mavsum "Manchester Siti" o'ng qanot himoyachisi Demeako Dyuxani 45-raqamda o'ynagan. 18 yoshli futbolchi o'sha mavsum "Manchester Siti" U-23 safida 16 o'yinda maydonga tushib, 1 ta golga assistentlik qilgan.
Abduqodir Husanov (O'zbekiston)
Buyog'iga Mario Balotelli tanitgan 45-raqamni Abduqodir Husanov yanada porlatishga xizmat qiladi. Umid qilamizki, O'zbekiston MTJ himoyachisi bu raqam ostida Xosep Gvardiola jamoasining asosiy figurasiga aylanadi.
Bosh sahifaga
193
