"Markaziy" stadiondan: "Navbahor" muxlislarining iltimosi va jurnalistlarning etirozi

Mazkur o'yin atrofidagi tafsilotlarni yoritish uchun "Championat.asia" ijodkorlari ham Namanganga tashrif buyurishgan. Vaqtdan unumli foydalanish maqsadida o'yinga qadar "Markaziy" stadion atrofida "Ko'chadagi kamera" loyihasining navbatdagi sonini tasvirga oldik. Ushbu dasturni kuzatganlarning xabari bor, xalqimizning futbol haqidagi fikrlarini bilish maqsadida odamlarga mikrofon tutamiz. Bugun ham shunday bo'ldi. Etiborli jihati, namanganlik jonkuyar ishqibozlarning aksari terma jamoaning rasmiy o'yinlari ham "Markaziy" stadionda o'tkazishilishini istayapti. Ular o'yingohning to'lishiga kafolat berishmoqda... 

Tushdan keyin o'yingoh atrofida yig'ila boshlagan muxlislar asta-sekin stadionga kirib kelishyapti. Xullas, hammaning kayfiyati yuqori, Namangan xalqi terma jamoaning o'yinini bayramdek qarshilamoqda. Biroz avval ular bilan suhbatlashganimizda mazkur arenada o'tkaziladigan o'yinlarga kirish uchun chipta narxidan noliganlar ham, teskari fikr bildirganlar ham bo'ldi. SHunday bo'lishiga qaramay, "Markaziy" o'yingohni doimiy ravishda to'ldiradigan muxlislarga tashakkur! 

Stadiondagi muhit ajoyib, haqiqiy futbol atmosferasini his qilish mumkin. Lekin, uchrashuv atrofidagi voqealarni yoritish uchun o'yinga tashrif buyurgan bir qator sport jurnalistlarining ahvoliga havas qilib bo'lmaydi. SHaxsan o'zim "Navbahor" jamoasi uy o'yinlarini o'tkazadigan o'yingohga birinchi bor tashrif buyurdim va OAV uchun yaratilgan sharoitlar meni hayron qoldirdi. Butun boshli stadionda jurnalistlar uchun mo'ljallangan media-tribunaning o'zi yo'q ekan. Bizga muxlislar o'tirgan sektordan joy qilib berishdi. Ochig'i, oldimizda o'tirgan muxlislar o'rnidan turib olsa, o'yinni matnli tarzda onlayn translyaciya qilish tugul, maydonni ko'rishning iloji yo'q. Stadion mamuriyati kelasi o'yinlarda ushbu holatga etibor qilishlarini so'rab qolardik. Har holda professional klublarimiz o'z o'yinlarini o'tkazadigan arenalarda futbol targ'ibotchilari bo'lgan jurnalistlar uchun eng oddiy sharoitlarning yo'qligi kishini xafa qiladi.

Mayli, amallashga harakat qilamiz. Maroqli tomosha!