O'zbekiston U-20 termasi darvozaboni penaltiga olib kelishi mumkin bo'lgan bahsli vaziyat, Indoneziya va Eronga qarshi bo'lajak uchrashuvlar haqida gapirdi

– Muhammadyusuf, avvalo, turnirni g'alaba bilan boshlaganingiz bilan siz va boshqa yigitlarni muborakbod etaman. Kechagi o'yinda jamoa hammasini yaxshi boshladi, ammo g'alabani ushlab qolish ilinjida 2-taymda biroz qiyinchilikka duch keldi. Ko'pchilik, shu jumladan, muxlislar uchrashuvning ikkinchi qismini katta xavotir bilan kuzatdi. Terma jamoamizning birinchi va ikkinchi taymdagi o'yini tubdan farq qilishiga nima sabab bo'ldi?

– Musobaqaning ilk o'yinlari har doim qiyin bo'ladi va bosim beradi. Biz buni tushinib turgandik. Raqib ham o'ziga yarasha kuchli, yaxshi o'yin namoyish etdi. O'ylaymanki, o'yindan o'yinga o'z o'yinimizni yaxshilab bora olamiz. Keyingi uchrashuvlarda yanada ishonchli o'yin ko'rsatib, ijobiy natijalarni qayd etishga harakat qilamiz.

- Penaltiga olib kelishi mumkin bo'lgan bahsli vaziyat ko'plab muhokamalarga sabab bo'lmoqda. Kimdir penalti bor desa, kimdir yo'q deyapti. Uchrashuvda bevosita ishtirok etgan darvozabon sifatida ushbu vaziyat bo'yicha nima deya olasiz? 

– Hakam qarorini muhokama qila olmayman. Bu vaziyatda nimadir deyish qiyin. Hakam vaziyaga juda ham yaqin edi va kuzatib turgandi.

– O'zbekistonning keyingi turdagi raqibi Indoneziya Eronga yirik hisobda yutqazganiga qaramay, Yamandan kuchliroq ko'rindi... Ularning o'yini o'rganib chiqilyaptimi? Murabbiylar va shaxsan o'zingiz Indoneziya bo'yicha qanday fikrdasiz? 

– Keyingi turda Indoneziyaga qarshi maydonga tushamiz. Oson o'yin bo'lmadi, o'zi umuman, buyog'iga oson o'yin yo'q. Menimcha, qolgan hamma o'yinlarni finalga tenglashtirsak bo'ladi. Ularga ham tayyorgarlikni davom ettiryapmiz.

– Qaysi yosh toifasi bo'lishidan qati nazar O'zbekiston va Eron o'rtasidagi qarama-qarshilik har qachongidan jiddiy tus olgan. 3-turda O'zbekistondan jang kutamizmi?

– Eron bilan o'yinda ham faqat g'alaba uchun maydonga tushamiz. Niyatimiz – guruhdan birinchi o'rin bilan chiqish va Jahon chempionati yo'llanmasini qo'lga kiritish. Raqib kim bo'lishining farqi yo'q, bor imkoniyatimizni ishga solib, asosiy maqsadimiz yo'lida harakatda davom etamiz.

Sherzod Nurmatov suhbatlashdi