Osiyo kubogi-2019 g'olibi: "O'zbekiston tarkibi kuchayib bormoqda. Misol, yaqindagina "Siti"ga o'tgan yosh yigitcha"

Feliks Sanches Bas "Al Sadd" bilan birga Elit OCHL 8-tur doirasidagi "Paxtakor"ga qarshi uchrashuvda ishtirok etish uchun, Toshkentga etib kelganidan xabaringiz bor. Kuni kecha ikki jamoa murabbiylari ishtirokidagi o'yindan oldingi rasmiy matbuot anjumanlari tashkil etildi. "Al Sadd" jamoasi bosh murabbiyi va futbolchisining ishtirokidagi matbuot anjumanida yakunlanganidan so'ng saytimiz jurnalisti Abdulvosit Bektemirov ispaniyalik mutaxassisga savol bilan yuzlandi. 

- Janob Feliks, siz Qatar terma jamoasini 2017-2022 yillar davomida boshqargansiz va mamlakat futbolining rivojiga katta hissa qo'shgan shaxs hisoblanasiz. Hozirgi kunda davom etayotgan JCH-2026 saralash bosqichida bor-yo'g'i 4ta bahs qoldi. Saralash bosqichidagi Qatar terma jamoasining ishtiroki haqida fikr bildirib o'tsangiz? Qatar terma jamoasining mundial yo'llanmasini qo'lga kiritish imkoniyatlarini qanday baholaysiz?

- Hozir Qatar biroz qiyin holatda. So'nggi vaqtda qayd etilgan natijalardan so'ng Qatarning to'g'ridan-to'g'ri Jahon chempionatiga yo'l olishi masalasi qiyinlashdi. Mening fikrimcha, terma jamoamiz ancha kuchli tarkibga ega, biroq guruhdagi raqiblarimiz ham jiddiy jamoalar. Oldinda to'rtta bahs bor va biz ushbu o'yinlarda imkon qadar ko'proq ochkolar to'plashimiz kerak. Avvalroq aytib o'tganimdek, hozirgi holatda to'g'ridan-to'g'ri yo'llanmani qo'lga kiritishimiz mushkul. Pley-off bosqichi orqali maqsadga erishish ancha osonroq deb tuyulmoqda.

Hozirgi Qatar ancha kuchli va ajoyib futbolchilarga ega. So'nggi Osiyo Kubogi bunga isbot bo'la oladi, ammo har doim ham JCHga chiqaverish oson emas.

- Iyun oyida O'zbekiston va Qatar terma jamoalari yana bir bor to'qnash kelishadi. O'zbekiston oxirgi ikki o'yinda Qatarga mag'lub bo'ldi. Saralash bosqichining so'nggi bahsidan nimalar kutyapsiz?

- Ushbu bahs ikki terma jamoa uchun so'nggi imkoniyat bo'ladi va bu bahs qanday katta ahamiyatga ega ekanligi haqida gapirishim shart emas. Mundial yo'llanmasini qo'lga kiritish uchun so'nggi imkoniyat bo'ladi, axir. Qatarda tarkib kuchli, O'zbekistonda ham. So'nggi yillarda O'zbekiston terma jamoasi kuchayib bormoqda va mamlakatingiz qanday futbolchilarga ega ekanligi namoyon bo'lib kelmoqda, ayniqsa iqtidorli yoshlar. Masalan, yaqindagina "Manchester Siti" safiga borib qo'shilgan himoyachingiz. Umumiy xulosam, ikki jamoa ham qiyin bahs bo'lsa kerak.