"Aral Samali" bosh murabbiyi Temur Turdiev: "Bunday hakamlar bilan uzoqqa bora olmaymiz"

"Bu ikki jamoalarning to'qnashuvi Angliyada bo'lgani kabi o'ziga hos derbi hisoblanadi. O'yin ikki jamoa uchun ham qiyin kechdi. Ayniqsa ruhiy tomondan ancha qiynaldik. "Xorazm" jamoasini bilardim. Tarkibida tajribali futbolchilar yig'ilgan. Bizga nisbatan Superligada to'p tepgan ijrochilar ko'pchilikni tashkil qilardi. Mahorat va tajriba o'z so'zini aytdi baribir",- deya gap boshladi murabbiy.

- Norxon SHeripovning o'yinidan qoniqish hosil qildingizmi?
- Uning kelajagi bor. Umuman olganda qoniqish hosil qildim.

- Jamoaning joriy yildagi maqsad va vazifalari qanday?
- Asosiy vazifamiz jamoani shakllantirish. Hozirda shu jarayon ketmoqda. Texnik bazamizni, jamoani shakllantirib olganimizdan so'ng bosqichma-bosqich Superliga sari qadam tashlab boramiz.

- Rasul Musaevning jarohati qanchalik jiddiy?
- Navbatdagi o'yinlarda ishtirok etadi. Jarohati u qadar jiddiy emas.

- O'yin davomida ko'p xushtak chalinish holatlari yuz berdi. Hakamlar haqida fikringiz qanday?
- Gapirish qiyin. Futbolni rivojlantirishni istasak bunga jiddiy etibor berishimiz kerak. Maydonda futbolchilar o'rtasida kurash kechadi. Lekin hakamlar arzimagan to'qnashuvlarga ham xushtak chalishyapti. O'yinashga berayotgani yo'q. Men o'zim ham futbolchi bo'lganman. Muxlislar ham hakamlardan norozi bo'ldi. Biz bunday hakamlar bilan uzoqqa bora olmaymiz.

- Aynan nechta vaziyatda hakamlar xato qildi, deb o'ylaysiz?
- "Xorazm" safidagi 22-raqamdagi futbolchi bir necha marotaba fol ishlatdi. 4-5 vaziyatlarda hakamlar indashmadi. Yordamchilar kuzatib turdi. O'tgan mavsum ham shunday holat bo'lgandi. Jizzaxda o'ynaganimizda hakam yaqqol penaltini qo'ymagan, natijada biz 1:1 hisobida durang bilan qaytgandik.

- Natijani hisobga olmagandan "Aral Samali"ning o'yinidan qoniqdingizmi?
- Yuz foiz emasku, 80 foiz qoniqdim. Oxirida yigitlar charchab qolishdi. Mavsumga tayyorgarligimiz ham haminqadar bo'ldi. Boshqa jamoalar singari Toshkentda yig'in o'tkaza olganimiz yo'q.

- Navro'z Alimov ko'p yuklama olgan edimi?
- Hujumchimiz o'zida charchoq sezdi. Tetik va kuchga to'lgan futbolchilar yordam bersin, deb uni almashtirdik. Yigitlarga maksimal darajada kuchlarini sarflashgani uchun rahmat aytib qolaman. Lekin zaxiradan maydonga tushgan futbolchilar o'yinni kuchaytira olishmadi.