Aleksandr Ejov: "Ro'zimboy Ahmedov liderlik qobiliyatini ko'rsatishga intildi"

"O'yin haqida nima ham derdim. Qiziqarli va kurashlarga boy o'yin bo'ldi. Ushbu uchrashuvda yutishimiz yoki aksincha yutqazishimiz mumkin edi. Raqibni ham bir ochko bilan tabriklayman. Umuman olganda bahs durangga mos tarzda o'tdi. Yigitlarda bosim kuchlilik qildi. Lekin berilgan ko'rsatmalarni bajarishdi. Hakamlar haqida gapirish mening vakolatimga kirmaydi. Ularni nazorat qiladigan kishilar bor",- deya gap boshladi Ejov.

- O'ylab qo'ygan rejalaringiz amalga oshdimi?
- Barchasi ham amalga oshmadi. Aytganimdek yigitlarda bosim katta bo'ldi. Ishlashda davom etamiz.

- Maydon holati haqida nima deya olasiz?
- Maydon ideal holatda edi. Muhit ham ajoyib bo'ldi. Buning uchun muxlislarga minnatdorchilik bildiraman. Ko'plab ishqibozlar orasida to'p tepish albatta boshqacha zavq beradi.

- Raqib jamoa tarkibida qaysi futbolchini ajratib ko'rsata olasiz?
- "Aral Samali"dagi Navro'z Alimov va Azamat Allaniyozovni yaxshi bilardik. Bizdan esa Ro'zimboy Ahmedov liderlik qobiliyatini ko'rsatishga intildi. Orqa chiziqda esa G'ayrat O'daev. Unda ko'p narsa o'xshamagan bo'lsa ham yomon o'ynamadi.

- Bugun "Xorazm" voha derbisida ikki ochko yo'qotdimi yoki bir ochko qo'lga kiritdimi?
- Yuqorida takidlaganimdek bugun yutishimiz yoki yutqazishimiz mumkin edi. Ikki jamoa ham ochko yo'qotgani yo'q.