Emmanyuel Peti “Arsenal” tarkibi haqida: “Futbolchilarning yarmini haydab yuborardim”

“O'ylashimcha, ularning oxirgi yillardagi asosiy xatosi bu ahmoqona transfer siyosati. Tushunarli, gap pulga borib taqaladi. Ularda “Manchester Yunayted” va “Manchester Siti” kabi imkoniyatlar yo'q, ammo hozir ular mazkur klublardan unchalik ham uzoq emas. “Arsenal”da top o'yinchilarni jalb qilish uchun hali ham imkon mavjud. Biroq, so'nggi 6-7 yil ichida ular pullarni qanday sarflaganlari …

Buni kim nazorat qilmoqda? SHunchaki so'rayapman: ushbu qarorlar kimga tegishli? Bosh murabbiyning fikri muhimmi, bu uning zimmasidami? Yoki direktorlar kengashidan kimdirmi? Ular bu tipdagi futbolchilar, ayniqsa, himoyachilarni nega sotib olishganini tushunmayapman.

“Arsenal” o'yinlarini ko'rib, hissiyotga berilmaslikka harakat qilaman. Bunga qiziqmaslikka va emociyalarni chetga surishga urunaman. Ularga oddiy jamoa sifatida qarayman. O'zimga: bugun ulardan yaxshi narsa kutma, deb aytishimga to'g'ri kelmoqda. Ayni vaqt ular haqida shu fikrdaman.

Agar “Arsenal” nomini olib tashlab, shunchaki, jamoadagi futbolchilarga qarasangiz … Ular darajasi klubga to'g'ri kelmaydi. Mavsum oxirida klub, Arteta va direktorlar kengashi o'rnida bo'lsam, rostini aytaman, futbolchilarning yarmini haydab yuborardim. Buni ochiq gapiryapman”, deydi Peti.